UN  QUADRE  DE  MONDRIAN

 Presentata al Concorso 2001

Apre 'i occhj e un po' indurmentat

als la testa vers el sofitt

e ved dle lunghe sbarr

che formen tant retangol e quadrat.

Subbit m'è nutt in ment

un quadre de Mondrian tutt stilizat,

le su linee t'el spassi, che dinamismo,

che s'arfann al principi del cubismo

dentra sti retangol e quadrat

mancava 'na pnelata de color,

m' è bastat poch per capì

cle sbarre a cosa doveven servì

a spindulon c'eren dle grand tend

e Mondrian en c'entrava propri gnent,

eren tant separè dov la gent se fa curè

e 'na stansa d'ospedal dov la gent è tutta ugual.

Mo el bell incmincia d' sera

tutti quanti s'dann da fè,

qualcun mett in posision

el bichier sa 'l butiglion.

Chi ha prés el papagall

e l'ha mess t'el cumodin,

c'è pó quel sa la dentiera ,

che s' la leva quand è sera;

el cuscin un po' più bass

la coperta un po' più in só

la lucina de rispett

per non fè la piscia a lett.

Questa è l'ora del concert

el trombon ha già incminciat

de rinfors c'è el bombardin

la grancassa e du' viulin.

El sega legna sai su' sgón

ha taiat cinqu sei pianton

un colp d' tossa e 'na scurgina

che completa l'orchestrina.

Dop tutt ste bel concert

tocarìa anca dormi,

me  met gió, me gir t'un fianch

m'indurment com per incant.

En è manch pasat mez'ora;

una luc da luna park che rischiara tutt l'ambient

tre dotor, sei infermier, quasi un squadron

sa i carell e i lór bidon.

"To chiappa 'na goccia de cafè vér

che dop per te c'è un bel clister,

te invec en rida tant che ste bel cateterìn

dop tl'infil t'el pistulìn".

"Cuchìn mia ma te t'è gitta ben

fè 'na lastra de sotta a pian terén

oh . . . scusa tant, m'er già dimenticata

anch'ogg purtropp te salti la magnata !".

A ste punt me chiappa 'na desolasion

ho 'na tristessa adoss e un gran magon;

è già matina, el sól le cos indora

en ho più voja d' sentì sta tiritera.

Chiud i occhj, do sfogh a l'imaginasion

chiapp un pnelle cminc a piturè la mi pasion,

riemp de color i quadrat e i retangol,

de giall, de blu, de ross in tutt i angol.

Tutt me sembra più luminos,

più colorat com l'arcobalen,

e quest me basta

per essa più seren !