HOME Concorso 17

XVII°  Concorso  2018:

Tutti i Testi Presentati a Concorso

Tutti gli autori dialettali

Testi Premiati

AL MERCAT SA 'L CAROSÌN
di Anna Rita Ambrogiani

I FIOCCH
di Anna Rita Ambrogiani

LE FEST DI SGNOR...
di Arturo Bernini

LA MI URBIN
di Luca Busignani

EL MIRAGG
di Antonio Fontanoni

QUAND
di Enaide Galli

LA PISCÈTA
di Roberto Gaudenzi

L’UCELL
di Roberto Gaudenzi

LA LENA
di Roberto Gaudenzi

L’AQUILON ROSS
di Oliviero Luslini

RAFFAELLO
di Oliviero Luslini

CH’SIA NUTT CRETIN?
di Stefano Mancini Zanchi

L’AQUILON
di Giuseppina Ranocchi

VISITA ALLA CASA ALBERGO
di Giuseppina Ranocchi

EL CONCORS
di Gianfranca Ruggeri

NA CORSA TLA NOTT
di Gianfranca Ruggeri

SENSA VOC
di M. Teresa Spaccazocchi

LA FESTA DEL DUCA
di Giorgio Speranzini

MEJ COTT CHE CRUD
di Giovanni Volponi

LA TIGRE
di Giovanni Volponi

L’AMACA
di Massimo Volponi

 

 

 

Tutti i Testi presentati in Ordine Alfabetico d'autore

 

Al mercat sa 'l carosìn

di Anna Rita Ambrogiani - Urbino, 5 aprile 2017

 

Vaggh al mercat sa 'l carosìn

per comprè j'aranc, i mandarìn,

pere, mele, qualca banana,

hann da bastè per tutt' la s'tmana;

suchìn, pundór, un po' d'verdura,

bella, fresca, sper che dura…

C'è la banca d'i formagg

ch'invoja chi è d' pasagg:

pecorin fresch, parmigian stagionat

e c'ha anca j afetat;

i trovi boni t'un st' mercat.

Ecco ch' senti 'n odorin…

coc'ne el pesc maché vicin;

c' n'hann de varie qualità,

tant tant car en sarà.

Fritt, arost e gratinat:

ch'odorin per ste mercat!

Ecch la banca d'i prodott puglies,

m'avicin sensa pretés

per veda 'sa portne da chî paes.

C'hann i tarall sa 'l fnocchj,

oliv, peperoncin

mossarelle e formagin,

sansicc, salam e grasciolett,

è 'n p'cat ch'en c'hann el speck.

Prosciutt bon, tajat a man

e pó c'hann anca el lor pan

ch'arman fresch anca per dman,

quant è secch el magna el can.

Grand, d'varie forme e dimension,

che va ben per i magnon.

Ce pù fè la pansanella,

el pù fè anca sa 'l pundor

o la suppa sa i fagiol.

In tutt i mod è sempre bon.

Ogg c'ho un po' de pió da fè,

qualcos'atre ho da comprè,

un sinal per la mi' moj

e qualcosina anca per me.

Sa 'l carosìn pien a metà,

vaggh avanti un po' più in là.

C'è la banca d'i capell

du' che c'hann anca j ombrell,

mo en ho bsogn, el temp è bell.

Vaggh a veda d'i calsett

perché j ho rott sa le scarp strett.

Ecch la banca d'la biancheria,

du' che prò èn longhi quant sia

e c'n'è una che…mamma mia!

per comprè un para d' calsett…

era mej che stav t'el lett!

V'lev anca un para de mutand

mo en j ho pres, erne tropp grand.

In t'la banca d'i vestitt,

v'lev comprè 'na giachetta

del color d'la mi' bretta,

ch'en me stassa tanta stretta,

mo precisa en l'ho trovata,

cosé malé l'ho lasciata.

Gira gira, sicóm c'era la gent,

èn pasat quasi du orett,

ho pers tant temp

che alla fin…

en v'lev chiapè pió gnent.

A 'n cert punt me sent chiamè:

"Oh, bon om, nitt maché,

'sti calson j v'let provè?

Vann ben anca per la campagna,

quant piov l'acqua en j bagna."

Cosé ste para de calson

j ho provat e m'erne bon.

Compraria anca un para d' scarp,

nóv per la festa,

vist che qualch sold ancora resta.

Se dassa ment,

'na canotiera,

da portè matina e sera,

'na camiscia,

nova nova, liscia liscia.

Alla fin, el carosìn è propi pin.

Ben ho fatt, torne a casa sodisfatt,

artorne tutt content,

mo dopp 'na s'tmana

en c'arman gnent.

E cosé… s'vò magnè,

tutt i sabbot,

arpart da casa sa 'l carosìn…

per fè la spesa al mercat d'Urbin!

 

inizio pagina 

 

 

I fiocch

di Anna Rita Ambrogiani - Urbino, 12 maggio 2017

 

Stamatina è seren

mo buffa de brutt

e se te guardi intorne,

è anca tutt sciutt.

Vien dal foss sta nev,

portata só dal vent

e riemp i camp intorne

e anca le piant.

E' bell da veda,

propi bell per j occhj

tutt 'ste coton che sal…

da minda i piopp.

T'la luc radent,

sofusa d'la matina

ch'abraccia

tutt intorne la colina,

sti fiocch van só

e ancora só t'el vent,

só vers el cel

com tanti uc'lin

dal vol legér legér,

só vers el sol

spetacolari in t'el lor liev vol,

lontan, lontan quant sia…

salne com fossa 'na magia.

E io, maché,

asist ma 'ste miragg

che la natura fa…

t'el mes de magg.

 

 

inizio pagina 

 

 

COM ERNE LE FEST DI SGNOR STANTANN FA

di Arturo Bernini - Urbino

 

El racont è lungh, mo sicom tocca essa riassuntivi V'l' arcont un pestin a la volta. Scusatme se Ve facc sorbì sta bigiollica. "arcurdatve ch' sem al temp del fascio e la V di Voi era de rigor maiuscola.

 

Vo arcuntat che mama era na coca brava un bel po' e ch'lia era statta chiamata da na fameia de Sgnoron d'Urbin per preparai il magnè per le fest e quel ch'succdeva e c'sa se faceva drenta cla cucina t'un chi period d'le fest d'venta el centre vital de ste racont. Mo sopratutt io, en stav ti pagn da la voja d' veda ch'sa magnavne de bon per le fest grosse i ricch ch' c'avevne i puder.

Dop avè dat n'ochiata d' intorne per veda e per faV fè n'idea de cum'era fatta drentra, la cucina d'na casa de Sgnoron. Adess, incminc a sficanasè per veda e per div cs' avrien preparat da magnè de bon cle donn per i sgnor Padron. D'intorne, a sparpaiòn c'èra na mucchia del robba da magnè e da cocia, mo cminc dal camin, du c'erne du bei cepp de legna che Alfio aveva aces già da'la matina prest, e tel caldaròn l' acqua era già bulenta e ti do furnel de fianch ma'la iola c' era già la carbonella e quei erne già pronti, bastava sol d'acendi, anca le stuf erne 'cese. Cle donn sa i fiol e i marit, già da calch giorne prima avevne purtat di bei canestre pieni seppi d'ogni sorta de robba da magnè; pulam: galin, faraon, capon galinacc, och, annitre, pciòn, i cunil e po', i capretìn e gl'agnelin ch'arlevevne lor in campagna, già maseta e tutta spleta e pronta, gl'ov e di bei cest pieni de verdur de stagion cavol, broccle, verza, card, scarcioff, fnocch, bietle, spinec, e insaleta, le patet, le s'cpolle, le succh, i porr, l'uliva cruda, carot, sedne, sucche gialle belle grosse e anca i fongh già cotti e sot'oli in ti barattol de vetre. per la cucinona. In gir a sparpaiòn de cla robba tra sport e cest sa le verdur, sc'nera un bel pò e da pertutt. Sopra i tavlin. ti lavandin, tle sedie, tant che la cucinona granda pareva piò stretta.

Mo en c'erne sol na mucchia d'verdur, da capè e da cocia, c'erne i poj e la carne; mo tocca dì che da na part, del tavlinon c'era na gran mucchia de cacciagiòn, ch' l' aveva masata el fiol del padron ch'giva a caccia sa i su amich e un pò l'ha purtata el "Fatoròn". De caciagiòn sc'nera un bel po' e na mucchia de sort d'usclin pcinini e un bel po' de sorta de chi gross pernic, quaie, fagian palomb, lepre ch' era anca già tutta splata e anca mezza cunditta e messa in salamoia sa l'oli la pansetta e le bacch de ginepre, le foj d'melavre, l'aj, el vin, el pep. Cle donn d'la campagna, com V' ho dett erne già nutte ti giorne prima l' avene custuditta e po' arposta tel friguriffer; era la Rusetta ch' c'aveva el compit da badè sopratutt ma quella. Cla matina la Sor Elisa, la Dumestica ch' badava ma tutt le facend ch'sucdevne t'la casa, è nutta t'la cucina per avisè ma le donn che gl'ospit sarien statti de piò e la robba da magnè e da preparè e da purtè avanti t'un ch'el giorne erne un bel pò de piò, de mod che quel ch' stavne faiend duveva essa na mucchia de piò abundant e sicom che d'la robba c'nera a stuff, s'archmandava che quant c'erne gl'ospit per cle ocorens, en s'puteva fè a cicca e fè le figurac, alora era mej preparè e metta sò a tavola calch scond de piò; un pulastre, un cunil, cl'atra metà defaraona, en para d'pcion, opur n'arusticin de cusciott d'agnell, o stufat sa la scpolla e le patat, o rustitt sa le patat, o sa i cuntorne de verdur in abundansa. Mo sicom aumentavne le pietans ch' duvevne ancora preparè, duvevne stè na mucchia atente ma quel ch'stavne facend. Era impurtant ch'ogni robba a la fin fossa insapuritta giusta e nissa fora ben cotta e bona e ch'en s' brusciassa nient e ch'en nisser fora di disastre.

La Sora Elisa continua a dì: «Tnet cont donn, che durant i giorne de festa, cminciand dal cenon d'la vigiglia po' del giorne d'Natal, d' San Stefne, dl'ultim dl'ann, del Cap d'Ann e dl'Epifania, ce sarann com' ospit el fratel, quel de fora sa la moj e i fioj, n'antre po' d'parent da fora sa dietra tutta la fameia al cumplet sa i fioj e i nipot; po'ce da dì, che calch giorne de cle fest ch'hann da nì, c'avran com invitat calch Sgnor e lor amich e un para de capuriòn del Partit ch'èn tel Municipi sa le moi e pò darsi calcun per le cen d'le vigiglie, porterà anca i fiol, mo sò sigura che calcdun d'lor ce sarà anca per i prans!».

Sicom per chel giorne el da fè sc'nera un bel po' de piò, mo el temp armast invec era sempre quel per tutt quel che ancora tucava fè, a cont fatt tutt le coch avrien duvut armana t'la cucina sensa men fina a'la sera tardi e per quest duvevne armana a durmì in Urbin, e che en stasser in pensier perché Alfio s'è mess d'acord sa 'l Fatoron per falle partì prest a'la matina del giorne dop per falle cumpagnè sa 'n mesz fina vicina ma la casa lor in campagna. Po' l'Elisa se messa ha parlè sa tutt le donn per daj le prim dispusision, per faj sapè le varie facend ch' duvevne fè, una dietra a clatra, durant cl'a matinata in mod s'organizasser per incmincè ha preparè la robba via via, piò urgent, i vari sugh per i prim e subbit dop pensè ma 'l da fè de clatra mesza giurnata, per le pietans, tutt i scond e i cuntorne anca per tutt chiatre giorne d'le fest ch'duvevne arivè. Po' chiama ma mama e tacca a dì: «Natalina avet vist che el mi Alfio ieri e git dal maclar ha chiapè i pess de carne già taiati de vitell da preparè per fè el brasat e la paticiata e anca un toch de carne da macinè per i do pulpeton e per fè i sugh; po' le mi donn han purtat la ricotta e stamatina ve lessen e ve passen in padella le verdur, necesari per fe gl'impast per fè i canlòn, gli anglott e le millefoj, han gratat el pan, el furmai e clatre robb già da ieri, mo sò sò, andand avanti se Ve bsogna el lor aiut. specialment quant sarà l'ora de fè le sfoj, el dicet ma le mi donn. Po' Natala cum ho dett, Vo badat sopratutt ma quel ch'duvet fè: la pasticciata, el stufat o el fricandò (ch'saria la"fricassea" d'le spec d'arost de carne e de verdur tirate pian pian tel tigam, po', alla fin quant è cott ce se metten 'i ova). Adess purtam avanti le pietans el piò pusibbil, se fnisc e se metten via tel friguriffer e s'en basten, s'artirne fora da ma lè 'na mulichina prima e al mument ch' bsogna.»

Po' la Sora Elisa ha sicurat che tel bsogn durant la giurnata, saria arcapitata spess da lor t'la cucina per dè na mana anca lia e per cuntrulè com sarien gitte avanti le facend perché sa tutt chel da fè ch'c'era el temp stava scommod com le scarp strette. Per la robba del magnè, ch'se stava faiend durant la giurneta de mana in mana, ch'era pronta la Sor' Elisa avria dett qual' era la robba ch' duveva essa arposta tel: "frigurifer" (che no purett i dim la "sglatara", mo da i Sgnor era dett el: friguriffer; e sicom so gitt a vedle ma che sotta Ve digh com' era fat).

Adess, sapem, ch'el gross del magnè duveva essa incminciat e preparat sensa men già da c'la matina, e purtat avanti sensa fermass un minut per tutte el giorne; cusè s'è inchminciat subbit a sceia la robba c'avria servitt per el pranzs d'la sera d'la vigiglia; dop i pranzs del giorne d'Natal e de San Stefne.

Po' arcminciam dal cenon d' la sera dI'ultim dl'ann e i do pranz per el Cap d'Ann e a la fin tutta la robba armasta del magnè ch'saria argitta a fnì tel friguriffer, artirata fora, scaldata e servitta per la Pifania. Com la Sor' Elisa ha fnit da dè le dispususion, ha vultat le chiapp e è scapata da la cucina, se scatenat un gran: via vai, tutt'un corra d'in quà e d'in là e de 'n chiappa chiappa d' quell e de clatre, un lavaticc, un capaticc e en taiaticc de verdur e de carne. Po' dle gran fugh e di gran spari drente t' na stansa scura da cant la cucina c'la chiamavne dispensa. Ma la dispensa c'era el friguriffer sglatara (sopra l'ho già dett), perché ma lè drenta c'era già la robba de carne varia de baghin e de pulam, de cunill, d'agnell, tutta già splata, e de carne de bov da chiapè per purtalla tla. cucina. Un chiappa chiappa de tigam, de padelle, de pentol, casarol; pentulam de tutt le misur, un gran sbatacchiament de cuperchi, po' le cors dal tavlin al lavandin e da i lavandin argivne ma 'l tavlin, dov la robba da magnè niva cunditta, po' via da ma lè alle stuff o mal foch del camin dov ha spindulòn c'era el caldè e da na part d'la iola del camin c'erne i do fornell dov la Rusetta aveva ces sa 'l zolfne la carbonella, che io i svedntulav sa na ventarola che dop un pò me psava ch' me faceva caschè i bracc. Da le donn tutt el pulam niva taiat e svuidati da i raguian, po' i taiavne la cresta, el becch, i barbui e 'i ogna ma i dita, po' sopra la fiamma di furnell i sbruciachiavne i spuntichiòn d' le penn piò incarnitte e po' givne a sciacquai sotta el ragg d' acqua tieppida d'la canella de un di lavandin de cocc smaltat ch'c'aveva du canelle, una dl'acqua calda e una dl'acqua giaccia ch' butava un ragiulìn fin fin, drenta na coscla smaltata colma d'acqua du c'avevne mess a bagn i cunil e i lepre, necesari per lavai tutt el sangue. T'un lavandin da na part, favne bella mostra tre pach de becalà, ch' avevne tirat fora da drenta el friguriffer, mess a bagn sotta l'acqua per levai el sal. Da la sglatara le donn han purtat ma la cucina anca n'antre pò d'sort de carne, de baghin, d'agnell, de bua, che taiavne tel cepp tutta a tocch e a tuchetìn, a sconda de quel ch'ce duvevne fè. Un bel po' niva macinata e po' mischiata insiem sa quella macinata fina fina, di raguian ben lavati sa la giunta del pan e del furmai gratati e 'i ovi, l'erbetta, na gratata d'buccia d'limon, du spicch d'aj un pischin d'noc muscata, sal e pep; e po' l'han messa t'un tigam de cocc smaltat de maron, du c'avevne mess qualca cuchiarata lard macinat en tritarin de scpolla e 'n antre po' d'udor ch'niva muscinata svelt svelt per en fall tachè, cl'impast duveva servì per fè le riempitur, ma i pcion, la faraona, l'oca, l'annitra el galnacc e ma i cunill. Muchiati da na part, c'era anca di bei tocch de carne, de vitlòn e de baghin, pes d'agnell e de caprett da fè arost; la Tersina e l'Emma 'i facevne na sfilzsa de taitìn du ce infilsaven di cuncinin d'pansetta; po', calch tocch de carne per tiena tutt i cunditt niva rutulata e po necesariament niva legata fitta sa 'l spagh fin torne torne e dop la metevne ti tigam, de cocc o de ram sa na bas de cundiment de verdur tritate fine fine un para de cuchiarat de lard macinat e po' mentre la muscinavne ce spargevne sopra un bichier de vin, ch'mandava un fumaron udoros, t'un calch pess ce metevne el pasat o i pestin de pundor fatti da le donn de campagna ch'tiravne fora da i barattol de vetre per i sugh. E anca tutte clatre carne un po' d'udor, el pep, el fnochj selvattich, el rusmarin, el timo, el melavre, le bacch de ginepre e n'antre nivne cotte e cunditte sa tutt d'sorta d'udor s'cond se la robba giva cotta arost, a less, stufata a la caciatora, brasata, tel tigam in salmì opur brustulitta, o tel spied vicin ma 'l focaron di ciocch tel caminon o sopra tla bragia ch'd'mana in mana niva sparpaiata sotta le graticcol.

 

inizio pagina 

 

 

LA MI' URBIN

di Luca Busignani - Cagliari

 

Era mia, tutta mia, la mì Urbin.

Er'Agost, eren tutti via,

j urbinat eren in vacansa,

j student in qualca stansa,

e i turist scapaven fora

dalla mezza dop' un par d'ora.

Dop magnat, giv via,

quas' tutt i giorne,

per cont mia.

 

Er un burdell, poch pio' d'un fiulin,

en capiv na mucchia dle antichità, di turicin.

Ma dovev gi', dovev scape',

trascinat da un sentiment,

cminciav dal luggiat

e sentiv el cor content.

 

Era quella la mì Urbin,

piol, vigol e salitt,

del gran cald en m'importava,

da chel dì ch'l'avev capitt.

Giv pian sensa far rumor

per sentì el sù respir,

me riempiv del sù odor,

del silensi de chi mur

e pensav in fond al cor,

en farà mal mache' a murì..

 

inizio pagina 

 

 

EL MIRAGG

di Antonio Fontanoni - Sassocorvaro

 

Tutt' le matìn

scend t'un giardìn

e camìn per i su' stradìn

Da malè vegh i fior

che, com i vagh per toché

me se metten a' lontané

o me se fann pcìn pcìn

per sparì dal mi' camìn

Ormai sò convint

ch'èn fint

e in ste mi' pasagg'

m' acontent del miragg'

 

inizio pagina 

 

 

Quand

di Enaide Galli - Urbino

 

Capisci ch'se' dventata vecchia

quand per strada se' trasparent

nesun s'acorg ch'è fatt la permanent

 

Quand c'è tutt malé, mo en artrovi nient

vè tla cammera, en t'arcordi 'sa che da fè

arvè tla cucina e s'è brusciat el da magnè.

 

Quand t'arcordi le cos ch'è fatt da pcina

mo en sé 'sa ch'è magnat a la matina,

c'è 'l temp da gi in gir, mo en è voia

è già mezgiorne e vlevi fè la sfoia.

 

Quand per quel facevi t 'na giornata

en te basta 'na stmanata

quand pensi che tla vechiaia c'è piò sapiensa

invec en sann 'sa fanne dla tu' esperienza

 

Quand el rumor dla vitta è dventat silensi

e le voc' indistinte dla television

en te fann cumpagnia, te fann sol confusion

 

Quand sona el telefon: "Ciao, mama, cum stè?...

c'ho da fè 'na mucchia, ogg en poss pasè!…"

Arvè tel divan e t'adormenti malé.

 

inizio pagina 

 

 
La piscèta
di Gaudenzi Roberto - Fossombrone
 
"Chi non piscia in compagnia...
o è un lèdre... o è una spia"
 
Sta frès quant volt... l'avrèt sentita...
è statta la colonna sonora della mia vita!!!
 
Ce fermaven sa 'l muturín...
tutti in fila ti scálin...
senza savè ne tant nè quant...
la ghèra chi givá più distánt...
per avere... fiero al petto...
la scritúra "mister getto!"
 
"Chi non piscia in compagnia...
o è un lèdre... o è una spia"
 
S' el fèj adèss... fnísci in galera...
en sto schèrzand... è 'na robba vera...
 
Ho lètt propri stè matín...
che tèl mèzz del cèntre de Urbín,
ún fèva finta de lèggia el giornèl...
mentre piscèva tel mur del pálázz Duchèl!!
 
Èn han volut sentì ragion...
j han fatt subbít contravvenzion...
più de tremila euro de verbèl...
pò me sa che c'è anca el penèl...
 
e se incontre a stè ragázz... i vòj di...:
"che bel schèrz del cázz!!!
By Roby Gaudino
 
 

inizio pagina 

 

 
L'ucEll
di Gaudenzi Roberto - Fossombrone
 
'Na dmènnica matina, tla chiesa de S.Agustín....
durânt la mèssa è bochèt dentra 'n ucclín!!!
El prèt ch'era tel confesionèl 
ved a volè prèria l'animèl...
 
Tel mentre i parocchièn
continuèvne a preghè giungend lè mèn...
'na donna vèd l'uclètt...
el chiappa al vol e el porta al pett..!!!
 
Ma ad un cert punt...l'ucello inizia a cinguettare
e 'l prèt va súbit in tl'altare!!:
"Fratelli...per favòr...
chi c'ha l'ucell scapassa dalla chiesa del Signòr..."
I maschí se guardnè sa l'èria un pò stupita
pièn pièn s'incaminne vèrs l'uscita!!!
 
Ma èl prèt s'accorg subbit dell'equivoc madornèl:
"Me so' espress mèl...
arbochèt dèntra e státemi a sentire...
solo chi ha près l'ucello stamattina... deve uscire!!!"
 
A stè paròl sa la corona tle mèn
na ventina de donn... s'álzne pièn pièn...
a testa bassa sa la faccia vilita
s'avvian vers l'uscita.
 
Ma prima che scapasne el prèt l'implora:
"Fermatevi che sbagliate ancora!!
Tornate dentro figlie amate
perché io non volevo dir ciò che pensate;
quel che ho detto e torno a ridire...
solo chi a preso l'uccello in chiesa deve uscire!!!"
 
Fnita la frès t'ún istant...
le Sor ch'erne a sèda se alzne tut quant...
e rosc tla faccia pîn de vergogna,
cúrne vèrs la sacrestía per evitè la gogna.
 
"Ho santa Vergine, esclamò el prèt,
"Fètme la grèzia se potèt!!!...
senza far rumore... pièn pièn...
esca solo chi c'ha l'ucèll tle mèn!!!"
 
A stè paròl in fond alla návèta
una còpietta stèva tutta pickèta:
"Oh...non ha fatt mânch a státt vicin stretta stretta...
el prèt se accort che te fo' na pugnetta!!!
 

inizio pagina 

 

 

LA LENA

di Gaudenzi Roberto - Fossombrone

 

Ho riscoperto la bici, la mia bici, quella fatta di pedalate naturali, di soste in luoghi piacevoli, quella che mi porta a conoscere gente e scorci nuovi. In uno di questi, là dove il leggendario Duce da Forli era sovente incontrarsi con la sua donna Petacchi in un angusto albergo al lato della vecchia strada consolare Flaminia, dove ancora oggi i muri sanno di sesso, ho casualmente incontrato una misera canelletta d'acqua proprio sotto il livello della strada di fronte ad una casetta colonica rigorosamente in pietra. All'ombra di un gelso il refrigerio è totale: prima la bevi "a gozzo", dopo che l'hai fatta scorrere, poi la bevi a due mani, ti ci sciacqui la bocca spruzzando il getto sugli avambracci e sulle cosce, poi lavi il viso, il collo, insomma te la fai tutta tua tant'è fresca e rigogliosa.

"Gatacci, gìt' fori d'chèsa" sento vociare alle mie spalle.

Era una vecchina con dei gran occhiali che appena vista mi pareva la bella copia della matrigna nella fiaba di Hansel & Gretel.

"Sentne cald anca lora... apposta vojene gì dentra chèsa!"

"È vero signora, oggi fa molto caldo anche se in questo posto si sta sicuramente più freschi" le rispondo come a volermi giustificare di quella indebita appropriazione di acqua. "FORTUNA ST'ACQUA" aggiungo. Quest'ultima frase detta un po' cosi in dialetto ha dato il là a che lei potesse fidarsi di parlare con me che sarei stato ad ascoltarla, insomma che non ero certo un tipo che se la tirava preso dai tempi e dalle medie tipiche di chi va in bici vestito in quel modo come ero io.

E cosi mi racconta che ci trovavamo in un crocevia di più strade che portavano dai monti fino al mare di Fano.

"Io vengo proprio da Fano" le rispondo.

"Bellina Fano, ci vado una volta all'anno, quando i mi' fiòl me portne a magnè el pésc al mèr".

E lo diceva appoggiata con una spalla all'uscio della porta mentre si teneva con tutte e due le mani sulla tenda a strisce di nylon su cui era rappresentato uno sfondo marino celeste ed una palma. L'avrei caricata in bici per portarla al mare come regalo di questa sua maniera naturale di esistere.

"Ho visto che avete anche un bel forno a legna" le dico indicandolo all'interno di una capanna piena di ogni cosa.

"Scé, scé è a legna e anca quel l'accendém 'na volta all'ann, per Pasqua... ce cocem le crésc!"

"Ummm, buone - dico io - come la fate...con più tipi di formaggio e con il cappello in crosta che sborda da tegame!?"

"Propi dinchelmò... le fém achsé che en le più bon sa 'l formagg pecorin, el parmigèn".

"Due fette di salame, un bel bichieròtt de vin e via andare..." le suggerisco io risalendo in bici.

"Maghèri, pasètt, pasètt pur quant'è Pasqua, dismò sentit quant'è bona la cresca dla Lena"

"Come vi chiamate?" le chiedo incoriusito da tale nome.

"Elena, io mi chiamo Elena."

"Caspita che bel nome e poi è un nome antico, nobile insomma è un nome importante! !"

"El sò - mi risponde lei un po' seccata - el so che è important, ma io en el voj essa e allora me fo chiamè LENA!".

L'avrei caricata sulla mia bici, magari seduta sulla canna, col vento che le passava sui capelli per accompagnarla ad incontrare quel mare che lei stringeva tra le mani di quella tenda!

 

inizio pagina 

 

 

L'aquilon ross

di Oliviero Luslini - Urbino

 

"Guarda cl'aquilon ross

vola a piò non poss,

vers el ciel, vers el Sol:

è sol, è sol!

Vincerà?"

"Ma se sa!

El su color è quel dl'amor,

che c'è dentra ogni cor

e che semprè trionferà sensa dì chissà!!"

 

inizio pagina 

 

 

Raffaello

di Oliviero Luslini - Urbino

 

Dall'alt del monument,

mut e sgoment,

guarda la su' città svanire,

pian pian morire?

Alora pensa al Rinasciment,

in quest' Urbin quasi spent.

 

inizio pagina 

 

 

Ch'sia nutt' cretìn?

di Stefano Mancini Zanchi 2017- Fermignano

 

M'afacc'

da un Torrion a Urbin;

giust' pochi istant':

el temp 'd magnè 'n panin.

Me guard' subbit intorne;

Me rapisc' el paesagg….

L'orlogg' segna mezz'giorne

e sal pensier so' in viagg….

Tra mezza el verd' ch'circonda Urbin

s'nascond' a petta i Capucìn.

Quei d'l'aquilon e del ricover

di nostre vecch' tra quei ch'erne più pover.

Alle mì spall'

c'ho 'l pinc', i torricìn e…

la pineta d'front;

più in là c'è la fortessa e po' dopp' el mont.

Tel ciel arnuvolat voltegg'ne alt' i rass

Corv', rondin e pciòn

litigne e fann el chiass

e rompne anch'i minchiòn.

Intant' el sguard' vola lontan

dal Pietralata fin a le 'Scian' (Cesane n.d.r.);

e po' dal Catria oltre al Neron…

che panorama da 'sti bastion!

Un paesagg' anticch' mo sempre nov.

Afascinant sal sol' e ancha s'piov'.

Intant' me d'mand tra me:

"So 'n po' sentimental?

Me so invechiat?

opur so nutt" cretìn?"

La verità è ch'so innamorat…

Innamorat d'Urbìn.

 

inizio pagina 

 

 

L'aquilon

di Giuseppina Ranocchi - Urbino

 

 

Com ariva setembre

in Urbino ariva

la festa d'l'aquilon.

le diec contrad en tutt

un ferment, sempre più impegnat

per confrontass

per mandè l'aquilon

piò lontan

piò in alt

piò bel.

È daver 'na gioia

veda tel ciel turchin

tutt chi aquilon

de tutt i color:

rossi, verdi, viola, arancioni, blu!

I burdei, ancora de piò i grand

che corne e se scalmanne

per raggiungia l'obietiv!

Mo anca se sarà un sol

arivè prim

la festa d'l'aquilon è per tutt Urbin.

Emozion comun

di gran e di pcin,

evviva la festa d'l'aquilon

ribattezzata da Sgarbi

"la festa del ciel d'Urbin".

 

inizio pagina 

 

 

Visita alla Casa Albergo

di Giuseppina Ranocchi - Urbino

 

Ogg so' gitta a fè 'na visita

alla Casa de ripos d'Urbin,

vagg a trovè le signor dimenticat:

dai fiol,

dai fratell,

da le sorelle e le cugin,

dimenticat anca dal Signor,

anca lo, sa tutt la confusion

del mond, en c'la fa piò,

se sta invechiand

com i ospit dla casa de ripos!!!

 

Lor me guarden,

me prenden le man,

m'accaresne com se fa

a chi vo ben.

M'arcontne un po'

del lor pasat…

I port sa la sedia a rotelle

davanti la finestra,

se meraviglien sempre

davanti le finestre

guardand el panorama!

 

Po me guarden

e me chieden sempre

se ho incontrat el lor fiol…

e, a la mi risposta negativa,

subit troven la scusa per el fiol

che en se fa mai veda…

"Ha tanto da fare,

ma se avessi bisogno

sarebbe qui in un momento".

I en so che madri

en stat per i lor fiol,

ma so che i han date el latt

e tutt quell ch'aveven bsogn

e sopratutt han dat

a lor la vita…

e per aver ricevuto

ste gran don

se meriten rispett

un po' d'atension

e anca un po' d'AMOR.

 

inizio pagina 

 

 

El concors

di Gianfranca Ruggeri - Urbino

 

Mal concors de poesia

ch'me so iscritta stamatina

ho dmandat cum se faceva

per potè partecipè

M'han rispost:

"Cara Franchina

te l'è propi da sapè;

de tutt le poesie ch'è scritt

piò de due en ne po' mandè.

E' nut fora un bel casin,

cum poss fè adess a sceia

ch'el poemett ch'sembra piò blin,

quand me sembren dacsè belle

tutte quant le poesie,

solament perchè l'ho scritte

solament perch' en le mie?

E alora cum poss fè?

En le scelg, m'affid al cas,

le mett tutte t'un sacchett,

gir, arvolt, facc' i pachett

e tir so

quella ch'ho pres,

sarà lia c'avrà piò pes

per la partecipasion.

E s'en vinc va ben listess

tant incmic a scriva adess

girà mei la volta che,

avrò scritt

soltant per me.

 

inizio pagina 

 

 

'Na corsa tla nott

di Gianfranca Ruggeri - Urbino

 

Corr, corr

corr tla nott da per me

tra i bosch me guard indietra,

corr, mo en nel so perchè.

So sfnitt

me guard intorne

corr tla nott com un matt

c'ho na paura adoss

ch'me chiappa fina t'i oss.

Mo perchè fugg

me dmand?

Sa c'ho davè paura

Chi è che me corr dietra,

du è che s'è nascost

che sent i pass, mo pro

en so du è ch'è lo'.

Io corr lo stess

so sfnitt

i ram me vengh'ne adoss:

"lasciatme stè, en el vdet

com'è che me so' ardott:

so' mort, so' mort, so' sfnitt

so' propi brutt e gitt".

Corr, corr fin a caschè.

Oddio so' mort daver,

so' mort tel cimiter,

so' tla cassetta oddio

so' mort, so' propi io.

Invec en è dacsè;

so tel mi lett, machè

so' viv

ho sol sognat

me so tutt... inventat.

Porca miseria eppur

era anca bell a viva

n'avventura tla vitta,

è 'n p'cat che sia già fnitta.

 

inizio pagina 

 

 

SENSA VOC

di Maria Teresa Spaccazocchi - Peglio

 

Tel bosc,...na pigna secca, un rem de pin,

cerchev per fè ornament sopra el camin,

com un quedr el mi panier se pitureva

de colori, de profumi, se farciva,

sol i passi tel silensie scrichiolevn,

sol el cor insiem al picchie garegevn,

d'impruvis un'emosion se scateneta

t'un c'la pec la mi atension vien atireta,

chi me cerca! chi me chiema sensa voc

ferm el cor pr'ascoltè... vicin al noc,

en m'arcord com so ariveta fin malé

na foleta forse d'vent ma fat volè,

piatet, apetta al noc, steva bon bon

quatt quatt, tra un pess de raica en bell pietron,

spunteva na spec d'ela fatta d'sass,

chiedeva d'aiutal a liberas.

Ruspand tra foj e muschi e terra dura

m'aper davanti ai occhi na figura,

un angel! ! ! dentra un sass s'era incastret

sa sgorbia e scalpelin l'ho liberet.

Me rid adess, felic sopra el camin

giocand sa le pign secc, e i remi d'pin.

 

inizio pagina 

 

 

La festa del Duca

di Giorgio Speranzini Ancona

 

URBIN d'Estat, le fest nott e giorne

ardunen i vilegiant tutt'intorne.

La Cita' tutta 'n ferment,

se tira sa l 'arch in Piassa del Rinasciment

se sfidne in tel centre

i Malatesti e i Montefeltre

rumor de spadon e de scudier

tra Montefeltro e Malatesta ; è 'l lor mestier

el Duca sal nason,

scappa fora da'n porton

la Duchessa sua Battista

sa la faccia un poco trista

i cavalier e i giocolier,

insiem ai forestier

sa le dam sopra la mana

venghne avanti tla strada piana.

El rull d'i tambur

arsona su pì mur,

la Fortessa seppa e gaia

de balestre d' Senigaja.

Le vie del centre, n' acampament

un mercat per fe' content,

sotta la luc' d'i Toricin,

i bordei ridne sa i buratin.

In tl ' aria, musica medieval e rinascimental

sembra propi 'n Carneval,

al Mercatal corsa e fiaton,

spetacol dl' A I T A e cascaton,

in tle strad un gran bel chiass

tutti quanti vann' a spass,

chi va da vall, chi da mont,

prò tenemce 'ste strad da cont.

A la fin un gran final

foch ' e fiamme al Mercatal.

E' l'termin d'la serata,

tutti stracchi d'la giornata.

E difatti dett e fatt

torn a casa sodisfatt !

 

inizio pagina 

 

 

Mej cot che crud

di Giovanni Volponi - settembre 2017

 

C'è na bestia de gran stassa

che t'i bosc ruvista e sguassa,

pol sembré guasi 'n maial

mo s'te chiappa te fa mal.

En è rosa o grigiolin:

el su pel è marroncin

e se'l guardi da davant

ha le zann d'un elefant.

Po', s'en basta, el su mantell

te fornisc un "gran pennell".

Se c'è l'ort è na sventura,

mo se guidi è na sciagura.

En c'è manc h n'agricoltor

ch'en ha avut un dan da lor,

così com ma tant person

'i han sfasciat anca i gippon.

 

Una volta un tal mesz matt

n'ha pres un e l'ha legat

in caten per strascinal

al palasso provincial.

Mo siccome l'ha stressat

una multa s'è becat.

 

Tolt el caso singolar,

molt più unico che rar,

quel che arman de sta genìa

è la lor goloseria:

sent na raica da lontan,

scava scava com un can

finché el bulb en l'ha trovat

gratta mej d'un bel bobcat

ch' sia un prat o ch' sia un foss

è capac de scavè 'n poss!

L'unic preg de ste bestion

viene dalla selesion.

Dall'autunn a fin genar

tle colin è tutt un spar:

"Han apert la selesion!"

"Tira fora i cartuccion!"

Dacsé la calamità

fnisc per essa na bontà;

en c'è bsogn ch've spieghi adess

s'è più bon arost o less:

tutti sann 'i abbinament

ch' la su carne te consent.

È saput e risaput

che 'l cinghial (cot) sta ben sa tutt.

 

inizio pagina 

 

 

La tigre

di Giovanni Volponi - Settembre 2017

 

È d'estat, na caldana che en s'ne pol piò, 'n ummid ch'se taja sa 'l curtel. Apena tramonta el sol via a spalanché i scuron per fé entré chel filarin d'arietta che, anca se en è fresca, almen te dà l'idea. Nel frattemp vé a magné calcò, esclusivament roba cruda, insalata, frutta, pasta fredda e compagnia bella per en dové cenda forn e fornei. Dop cena, te metti a giagia tel divan e sa 'l telepilot saltelli da 'n canal tun c'l'atre sperand de veda calcò de fresch… Cle belle reclam di gelat, o quelle dle cicche che magicament se le tieni in bocca soffi aria conglata che manch i condisionator piò potenti del mond. Insomma tant en ce nient da fé: è cald e cald arman.

Mo en el sé che qualcun nel frattemp sta tramand contra de te. Mentre te si ancora tel tu divanett comod e te rilassi, sfinit da la giornata, tla tu camera da lett un intrus sta facend el gir de ricognision, in attesa del prim malcapitat. Passa n' oretta, l'occh se fa bagarin, la palpebra vien giò, un sbadigl tira c'l'atre e te addormenti sedut sa la tv accesa. Ore dop, el bracc do t'eri pogiat en te regg piò e te s'è indurmentat, se schianta tutt 'na volta, la testa cad tel braciol, fè un stols com se fossa scopiata na bomba e per poch en te strossi sa chel filarin de saliva ch'avevi in bocca.

Appena te s'è arsvejat el bracc, decidi ch'è ora de gì a lett. Picci la luc, chiudi la tv, barcolli fin alla porta dla cucina, chiappi un bichier d'acqua da porté tel comodin, e finalment entri tla camera. "Oh, che fresculin!", pensi tutt soddisfatt, "Ho fatt propri ben a tien aperta la finestra". Sa 'l senn del poi, mai c'è stata fras piò sciagurata. Poggi el bichier, chiudi i scuron, chiudi la finestra, te spoi e te metti finalment tel lett. Oviament sensa copert. Dop manca du minut si già in fase rem. Che gust a dormì beati a quatre de spadi tel lett. Ma, com in tutt le stori ch'se rispettan, en pol gì tutt ben. Lì per lì te sembra de sogné, ma dop capisci che el senti per daver: un sibil infernal, un ronsio diabollic, un rumor unich e indimenticabil. La zanzara tigre. È propri lia. Te svei tutt d'un bott, adrenalina a mill, picci la luc, salti in pied tel lett, guardi dappertutt, mo nient, en la vedi. Scendi dal lett, fé un, do, tre giri dla stansa, mo ancora en se ved nient. La tigre ha 'n vantagg: mentre te eri tun c'l'atra stansa, lia nel frattemp s'è fatta el gir dla tu camera da cima a fond, s'è studiata ogni angolin scur, ogni buganin tra i libre o i vestit; ogni posticin nascost lia el cnosc. E te no. Quindi dop mesz'ora de imprecasion, t'armetti giò tel lett e provi el piano B.

Decidi da fé da esca: lasci la luc accesa, te piassi bel distes mo sa i bracc pront a colpì. In chel moment però senti el prim prurit tla gamba destra. Decidi d'armané fiss e concentrat. Poch dop senti prurit anca tel fianc e anca tla coscia. Tieni botta per 'n altre minut finché la man parte e te gratti com un can randag sa le pulc. Propri in chel moment ecch che ariva la tigre, mo te se tutt pres a grattat che quand l'è sentita e cerchi da capì se era a destra, a manca o sopra tel mesz, è già argitta via.

Piano C: te metti sotta le copert, testa compresa. Sol che dop un po' te par de soffoché e apri un spiraglin. Sembrerà impossibil, mo lia l'ha vist e te pung propri tel nas. "Ahi, che pissic!". Nient da fè.

Piano D: tutt copert tranne le braccia e la testa; quand ariva a un bracc sa c'l'atre la fé fora. Aspetta aspetta, lia nel frattemp s'è sasiata en  artorna piò. Alora t'archiappa sonn, pian pian t'ardormenti e… zac! Ecc che lia artorna e t'arpung tel bracc, mo quand te se acort è tropp tardi. Nel frattemp un po' te si agitat, un po' la luc accesa, un po' l'aria consumata, insomma la camera è artornata un forn. Decidi per la solusion final. Chiappi el spray antizanzar, te ungi che manch fossi uscit dla padella del fritt, tel sprussi dappertutt, anca tla faccia. A chel punt artoi le copert, t'armetti a quatre de spadi e chi t'amassa? Vé alla finestra per arspalanché i scuron, appena apri i vetre senti un ronsio che s'allontana. "La tigre è fugitta! Stupend!" Quand vé per riaprì anca i scuron però, n'amara sorpresa: è giorn. Énn le sei e mesza per la precision, e t'accorgi d'avè durmit sé e no n'oretta. En se propri sa fé, quand…

piano E: fé la doccia, te vesti, te prepari e fé la colasion. N'atre giorn è inisiat, n'atra lotta sa la tigre sta per cmincé.

 

inizio pagina 

 

 

 

L'AMACA

di Massimo Volponi - Urbino

 

Sto, dagiat, d'estat, tl' amaca, tel giardin,

e sent dla frescura la caressa,

mo, sol, tel mi cor avert l'amaressa

de non avet machè, petta me vicin.

Me gir e m'argir, fantasticand el vis

dla mi donna, dl'unnic mi amor,

e vegg, bandonat tl'amaca, el su' soris,

mentre affer l'aria e me batt forte el cor.

 

Poggiata sopra un ram me guarda 'na capinera:

Va' a chiamalla, per favor, chè è ormai sera…

 

 

 

inizio pagina