Tra de me

di  Daniele  Ambrogiani

 

Un giorne per cas un d' quei ch' en s' fa gnent

m' artrov tutt' un quant in mezz' alla gent.

            De colp tutti s'girne e sensa 'n perché

            me guardne me fissne e smettne d' parlè.

Mo subbit s' arcoien, se gratten el nas

s' armettne a discorra e nessun c' fa pió cas.

            Stranitt e sturditt m' apogg contra 'n mur

            ste fatt acsé stran m'ha rés insicur.

Io ch' en avev fatt gnent propri de mal

ho avutt la paura de èssa ... normal.

 

INIZIO PAGINA

 

 

RAFFAELL

di Elio Bacchielli  (6 aprile 2002)

 

Grand el piacer per me, urbinat,

parlè de Raffaeli e do' Ló è nat

in t'la via ch'ogg porta el Su' nom

e d'abitalla ho avut anch'io el don.

            E sa le cas sém dirimpettai

            sensa, naturalment, incontracc mai.

            C'ha lasciat i pió grand capolavor

            e in t'el mond riscote tanti onor,

per quel ch'resta, com eredità

che sfida i secol e che mai morrà.

Pittor dla grasia e architett, d' Raffaell

s'ammira tutto quel ch'è bell.

            Ha incantat l'univers, sa la Su' art

            e ha estimator da ogni part.

            I sfond di' quadre, i putt e le Madonn

            èn le vision pió belle ch'èn al mond,

le stans, i color e le composision

i paesagg, l'armonia e imitasion,

hann fatt del celebr Pittor divino

un degnissim fiol dla Su' Urbino.

            Intorne al monument tla Su' città, al Mont

            de tanti Geni, i cippi, 'i stann de front

            degnissima, l'ultima dimora

            tra i Grand, al Pantheon, ch' l'onora.

 

INIZIO PAGINA

 

 

EL MOND DL'OPERETTA

di Elio Bacchielli   20 ottobre 2001

 

Spess arsent t'i mi' orecchj

belle musich, le operett

e prov sempre un  gran piacer

ch' me soddisfen per davver.

            Èn un teatro musical

            ch' bsogna prenda per quel ch'val

            e ascoltè de quand in quand

            un bel recitè cantand.

Èn 'na musica briosa

e la scena è festosa

l'atmosfera, spumeggiant

la magìa,  eccitant,

            'na ricchessa d'impression

            e un mondo d'evasion.

            Cant,  spettacol,  allegria

            avventura,  gioia e fantasia,

amor,  passion,  festosità

questa la celebrità.

I tenor e le soubrettes

'sa i lor celebri duett

            le ouvertures, i cicalecc

            sogn de valser, le marcett

            e le dans,  le gamb al vent

            en graditte dalla gent, 

alsne el tono dell'umor

e vann dritte, dritte al cor.

In tel mond, c' èn tanti autor

che riscoten grandi onor,

            'na trentina, le pió belle

            e le musich èn quelle

            che tant volt ho canticchiat

            e,  non sol, anca sonat.

Addio giovinessa e Cin-ci-là,

Sogn d'un valser, Sangue viennes,

la Vedova allegra, el Pipistrell

el Paes del sorris e quel di' Campanell:

 

èn tla mi' interiorità

e me dann gioiosità.

 

INIZIO PAGINA

 

 

LA  NEV

di Nino Cesaroni

 

Le campan dla chies vicina

sonen a chiocch stamatina

e p'el gir di Debitor

en se sent tutt chel rumor,

            se sent sol qualca vocina

            dai scialpon ch'fann da sordina

            e la Laica che abaia

            par ch'è sotta 'n crin de paia.

Subit facc el pensament

che c'è qualch inconvenient,

sent a dè dle sbadilat,

en c'è dubbi ha bufat.

            Scend dal lett, dagh 'na guardata

            vegh la strada imbiancata,

            tir pió in só la tapparella,

            dic mi' moi: "O questa è bella!

C'è 'n solustre, ogg c'è 'l sol?"

"No, hann stés un po' d'lensol,

e arluc’ne perchè 'i hann

lavati tutti sa'l Dixan! ..."

            Prò guardand ste panorama

            tutt de bianch come 'na dama

            fresca e bella com 'na rosa

            in chel giorne che va sposa,

podrè dì sol quant è bell,

com facevi da burdell

che corevi tutt cuntent

sa du pess de legn scadent,

            per travers qualca striscia,

            sò p'el Mont a fè la liscia;

            eri el pió felic del mond,

            anca sa le scarp tutt sfond.

Adess se la nev 'i manca

van a fè la "stmana bianca",

mo ma nó d'na certa età

anca questa c' bastarà.

            Sé, d'acord, a veda è bell

            mo era mei quant'er burdell.

 

INIZIO PAGINA

 

 

DU URBINAT IN PIASSA

di  Nino Cesaroni

 

Pasav in piassa una de ste matin

quant ho sentit chiamam da ùn d'Urbin,

m'ha dett: "Te ch'se d'Urbin, nat tra sti mur,

com del rest so i', e te el sê sigur,

guarda maché intorna se se' bon

da trovè ùn come nó tra ste person,

ch' sia un ver urbinat al cent per cent,

è 'n pess ch'i so maché mo en ho vist gnent!"

Per fal cuntent e per curiosità

ce sêm méssi tutti due a indagà.

C'era 'na mucchia d' gent in t'la piassa

e me pareva impossibil ch'en c' fossa

un dla nostra rassa.

Avém pasat al setacc parecchia gent

mo de ver urbinat en s'è vist gnent.

Ogg le città s' en imbastarditt

e anca el dialett

la stessa sort ha subitt.

Tra estramur, student e forestier

ùn d'Urbin en el trovi per daver.

E dacsé in chel moment bsognava dì

che in piassa c' n'era sol due: lò e i'.

 

INIZIO PAGINA

 

 

EL LAVATO'

di  Pierina  Dominici

 

El lavatò era el post più frequentat d' Fruntin

Sfermavne tutti: vecchj, grand e burdlin

El lavatò era come un salott

Capitava d' tutt: s' arposava, sfaceva l'amor e anch' a bott

A ogni ora del giorne, ogni stagion

Ognun scejeva el su' moment bon

            La mattina prest era occupat da le donn per sciacquà i pann

            E mentre lavavne s'arcontavne guai, avveniment o dann

            Era un moment bell da stà in compagnia

            Fin quant s'accorgevne ch' bsognava gì via

            Ma casa c'erne i burdej ad aspettà

            E la colazion per el marit da preparà

Vers mezzgiorne j omne sa j stival sbrodolat fin ma i ginocchj

S' fermavne a puliss prima da portà a casa el brocc

Chi 'niva sa 'na balla d'erba dalla salita forte e dura

S' fermava a 'rchiapà el fiat e un po' d' frescura

Chi rivava dalla Macchia di Castagn sa 'na fascina

S' fermava a sciugà el sudor e fa 'na pipatina

            El pomerigg quand i grand érne ma’l camp o a fa un sunlìn

            El lavatò era el regn di più pcin

            Arrampicat ma j trav o a cavalcion del murett

            Givne alla conquista del mond senza spada né elmett

            E quand' érne dventati padron del mond inter

            Un grupp giva tla piazza e cl' atre vers el cimiter

I vecchj ci potevi trovà ogni moment

Bastava ch' c'era qualcun per passà el temp

Du pettegolezz e quattre lament

A di' mal dle spos e di parent

Arcordà el temp dla giovinezza

Ch' 'i arzinguliva e 'i metteva allegrezza

            Al crepuscle quand sonava l'Ave Maria

            Le donn en s' fermavne e tiravne via

            Currivne a casa a preparà

            Qualcosa da metta sotto i dent da masticà

            Fa da magnà sa frenesia

            Sa poca robba e molta fantasia

Quand aveva sonat l'ora d' nott

S' vedeva gironzolà qualch ragazzott

Da lì a poch 'rivava 'na burdella

Che sol la gioventù faceva bella

'Rivava de prescia e in tutta fretta

Per scambià al vol un basc e 'na carezza

            Quand la nott era ormai fonda e scura

            En girava più nisciun per la paura

            D' incontra qualch' annima dannata

            Che t' un guf o 'na c'iuetta s'era 'ncarnata

            Invec tel bugh del mur da un mucchie d' ann

            C' aveva fatt el nid un barbagiann!

 

INIZIO PAGINA

 

 

OMBRA DEL VER

di Antonio Fontanoni

 

Chel bosch, per me, era tutt

nient de pió avria vlut:

una per una cnoscev le piant

i cespuj, le cerquelle, i rampicant.

En c'era stradin o slargh

o ram o foja, ruscell  e fangh

ch'en era stat da me visitat

o mej ancora misurat.

Cnoscev j animal, le belve feroc

i dirup, 'i uccell veloc.

Avev studiat, de bon'ora

la fauna e la flora

per avé idee più precis

per goda mej chel paradis

Malé giaceven i mi' pensier

e facev quel ch'avev calcolat ier

Pensav tel perché dla vitta

e a quand lia saria fnitta

Pò lentament

com s'en se vlessa mova gnent

ogni giorne c'era qualcosa de divers:

ogni robba perdeva sens

e gnent pió m'aparteneva

tutt in tle man m'ardeva.

Studiav e cercav da capì

mo tutt tendeva a sparì.

Adess chel bosch è fnit

è sparìt, sepelit

è stat sostituit

da 'n mond virtual

dov se corr com animal

per chiapè cl'ombra del ver

che m'ha 'compagnat fin a ier.

En c'ho pió el temp per ragionè

e pensè dentra de me

chi sém, sa facém, dov andrém

Va tutt' acsé veloc

ch' me sent in croc.

Stagh in dispart per èssa me stess

mo tutt me rincorr li stess

Me mov veloc per adatàm

mo tel profond c' ho 'n grand afann

perchè viv t'un mond evanescent

fatt de tutt e de gnent vast e infinit

e ch' me l' possen cancelè sa 'n dit.

 

INIZIO PAGINA

 

 

GUARDATLA TLA LUNA

di Antonio Fontanoni

 

Un serpent

sa la testa al vent

invitava

chi incontrava

a fidass

e gì sa ló tra i sass

lungh el fium

a 'rcoja l'or e le fortun.

C'era 'na mucchia de gent

che seguiva chel serpent

Le paiùss d'or che se trovaven

ma ló se consegnaven

perché diceva che a la fin

le divideva ben ben tra i citadin.

T'un giorne de vent

è volat via el serpent

lasciand un bigliett

fermat sa 'n sass t'un banchett:

"L'or l'ho portat sa me

mo vojatre potet continuè a cerchè

Se vlet la fortuna

guardatla, alla sera

spechiata tla Luna".

 

INIZIO PAGINA

 

 

LA BEFANA ALLA PIANTATA

di Sinonetta Fucili ( Epifania 1999)

 

M' aspetta 'na bella fatigata

quand ho da gì a fè 'l gir ma la Piantata.

A portè i don en sarìa gnent,

mo a la Piantata c'è troppa gent.

            Tel condominio, quel central

            me tocca pasè giù per le scal.

            Han stravolt anca 'l mi' destin

            en poss pasè più dal camin

perchè 'l tett è 'na meza bott

e io dovria caminacc de nott

Quant c'era sol Urbin, quel vecchj,

era 'n gioch a gì só per i tett

            e la gent, era piò generosa,

            me lasciaven sempre qualcosa:

            du mandarin un para d' ciavatt…

            e pó givne a lett quand'era nott

La gioventù d'ogg è d'n' antra rassa

a meza nott èn tutti in piassa.

Invec de scrivme 'na leterina

è roba ch'arvengne a le tre dla matina!

            Siamo alle soglie del duemila

            io so dventata 'na vecchia sportiva,

            se le pretés se fann calsanti

            ve mand al diavol tutti quanti!

So convinta, che tra tutt 'ste novità

la Befana prima o poi s'astufarà

e se st'altr'ann me tira el fiocc

la calsetta git a cumpralla all'Ipercoop.

 

INIZIO PAGINA

 

 

Vita da … gatti

di Sinonetta Fucili (dicembre 2001)

 

V'asicur ch'en c'è del matt

Se ve digh ch'vria èssa 'n gatt

En m'interessa d'èssa 'n gatt d' rassa

Tant i gatt en vann in piassa!

            Un bastard com el mi' Nino

            Un qualsiasi felino.

            Vria èssa 'n gatt d'apartament

            e magnè a uff sensa fè gnent,

Vria èssa 'n gatt a la matina

Quant el dover me chiama

Quant c'ho sonn che en ne poss pió

E invec de dormì me tocca stè só

            Vria èssa 'n gatt quant è ora de magnè,

            perché ma lò i basta sol a miagolè…

            Invec ma me se me vien fam

            el pranz en me 'l prepara, manca 'n can.

Vria èssa 'n gatt quant c' ho un pensier

Per podé dormì tranquilla per daver

Quant so' triste e 'n po' depressa

vria èssa 'n gatt per famm consolè sa 'na caressa

            S' fossa 'n gatt, quest è sicur,

            Podria caminè da cima 'l mur

            Perchè el gatt è indipendent

            E s' ne frega di parent

Vria èssa 'n gatt, invec so io

Per fortuna… grazie a Dio!

 

INIZIO PAGINA

 

 

SA TENERESSA

di  Carla  Galli

 

Era 'na casa vecchia

tutta spiffer e scalin,

le tendin ricamate

la cucina sa'l camin.

            Da dentra se sentiva

            le vicin a fè 'l batútt,

            'i udor e le chiacchier

            giravne dapertutt.

El chiass de nó burdei,

ingenuament dispettos,

scorassava per i vigol

saltellant e giocos.

            Arpens sa teneressa

            alle trecc d'una burdella,

            alla gioia per la vita

            alla gran sgrignarella.

Le robb ch' m' arcord

en hann un gran valór,

prò le tengh da cont

e le tir fora sensa timór.

            Com'è gitta, è gitta ben

            en voj tanti rimpiant,

            ho fatt quell ch'ho podut

            per i sbaj c'ho le scusant.

L'esperiensa dic che

la strada va in salita,

en importa, se va sempre

fina alla fin dla partita.

 

INIZIO PAGINA

 

 

El  futting

di Rosanna Gambarara

 

'I arveggh nì so a pied pian pian sa le glupp

el sàbbot. T'un ste vent de tramontana,

t'un st'odor d'nev 'i arveggh maché tla Csana

involtolati ti tabarr, a grupp

            de du o tre o d' pió, tla nev, sotta el ciel cupp.

            Digghen ch' qualcun, porett, fniva tla frana

            d'un refne, o pegg: calavne fin tla piana

            sa la fam ti budei, i dent gussi, i lupp.

'I arvegg mentre el vent fischia e l'aquerell

del ciel bluett se stempra tel violett

di mont, cola tel gel big dla campagna ...

            ùn corr sa i calsoncin corti, sa 'n brett

            d' lana e la trippa ch' balla. Era 'n bordell,

            m'arcord ... E en el so pió se rida o s'piagna.

 

INIZIO PAGINA

 

 

PANTA  REI

di Rosanna Gambarara

 

Passen i giorn i més e le stagion

e i ann e i secol sensa fè rumor

un dietra cl'atre com 'na procesion

danata a non fermass mai passne i fior

            e l'erba e le furmicch i ap i scorpion

            passne   passne i tramont passne le auror

            sa le sperans ingenue e le illusion

            passne  passne i pensier com el vapor

d'na nuvola e el rovell di sentiment

passne i inteletual i analfabet

passne i ricch i porett i pap i pret

            passa la storia sensa insegnè gnent ... En tla

            chiapè, coion è chi s'incassa,

            perché en ce s' pò fè gnent, tutt ma'l mond passa.

 

INIZIO PAGINA

 

 

Scriv,  Scriv

di Oliviero Luslini

 

A scriva tocca stè attent,

sopratutt in cert frangent;

perchè se pò cnoscia com se' fatt:

se se' bon, trist o matt!

Atravers i segn e le dimension,

te vieni capit sa 'na bona precision.

La Scensa dla scritura,

me fa un po' paura,

ma i' c'ho 'na gran considerasion

per chi cerca da cnoscia le person.

 

INIZIO PAGINA

 

 

ASCOLTIAMOLI ...

di Luigia Mancini

 

Sotto l'ombra di una quercia secolare

si riposano i due soliti vecchietti ...

sono seduti sulla solita panchina

che li ha visti felici giovanetti.

Con la gioia dei loro verdi anni

tenevano il lor mondo chiuso in un pugno ...

            era piccolo quel mondo fatto di sogni, di speranze,

            di desideri, di attese, perché, ai quei tempi,

            non tutto era "dovuto", non tutto era concesso,

            non tutto era permesso e ... mistero .. felici eran lo stesso.

            Una felicità fatta di poco ... una corsa in bicicletta ...

            una merenda sulla riva del fiume ... un film alla domenica ...

una festa da ballo a Carnevale ...

una passeggiata per il corso ...

una tavola imbandita nelle feste comandate ...

un regalo per il compleanno ... una gita al  mare ...

una serenata sotto il chiaro di luna,

dalla persona amata.

            Ne è passato del tempo da allora ...

            ma essi son lì, sulla solita panchina ...

            Lei sferruzza una sciarpa che non finisce mai,

            lui, lì accanto, con la pipa in bocca,

            sfoglia il giornale, e, ogni tanto, "sbotta".

            "Giuà - dice stanca e scocciata la vecchina -

            me sai di' co' borbotti 'sta matina?

             me dici  co' c'è scritto su 'sto giornale

             che me pare te fa sta' tanto male?"

            "Beata te, moie mia, che sferruzzi da matina a sera,

             reciti ogni tanto 'na preghiera

            e non t'accorgi co' succede 'nte  'sto mondo nostro

             do' le cose van tutte a traverso ..."

"Te, Giuà, me dai de la beata

come se da 'sto mondo fossi 'estraniata',

te sbai e te sbai de grosso perchè tante pene io me porto addosso ...

ma cerco de sta' calma e de non m'agità  

perché , poi, l' sai la pressione do' me va! ...

Vorria, p'r esempio cambià l'odio co' l'amore,

ma so che 'n posso ...

allora me rivolgo al nostro buon Signore"

" Hai ragione, moie mia, de stà calma

e cerca de pregà, ma io n' posso fa' a meno de brontolà

allora lasceme stà, lasceme sfogaà ...

e po' dimme se dico la verità ... 

... cendi la televisione ... ce fosse 'na volta

'na notizia che te tiene 'n po' sù ...

a l'ora de pranzo o de cena  te fanno strozzà

che la mulica che mandi giù.

Apri 'l giornale per datte 'na regolatina

e cominci male la giornata de prima matina ...

criminalità, omicidi, droga, frodi, prostituzione;

violenze de tutti i tipi che manco se posson nominà,

allora le cose hann da cambià

sennò cuscì 'n se po' campà.

Ma quello che me fa dannà, è, quando penso

che 'l progresso c' ha dato tante cose

pe' rende la vita più comoda e più bella

e l'omo 'n' trova pace, porca mastella ..."

            "Datte 'na calmata, Giuà, e famme contenta

            perché, l'so che me vò bene ... lascia gì de brontolà ...

            chiude 'sto giornale..alzete su dritto.,

            cavete 'l cappello..mette giù 'sta pipa.,

            e fatte 'l segno de la Croce che sona

            l'AVE MARIA e 'n antra giornata porta via."

            "Come sempre te do retta, moie mia,

            ma con tutte ste cose che m'hai detto de fà

            ne'l so da do' ho da comincià".

E quell'ora "che volge al desio"

riporta la serenità nel cuore dei due vispi vecchietti

che si avviano verso casa e rivolgono

alla madre celeste una invocazione speciale.

 

INIZIO PAGINA

 

 

TURIN - Dedicata ad un vecchio contadino

di  Alessandro  Duccio  Marchi

 

Carica el birocc

Tacc'le dietra i bua

Lé ... faicó ...

Vann ognun per i cass sua ...

Semina el lupin

Va a fè du fascin

L'acqua ma la vit

Quand'è nott se' sfnitt!

Turìn taiava el gran

Sa la falc'nara stretta tle man

El vent taiava el ciel

" Tira la Bora arvién seren! "

Malé t'un cla maésa

La sappa pesa

Com un dolor

T'el sol o t'la bufera

Fin alla sera

Sol sa'l sudor

Com un girasol

Quand tramonta el sol

Sensa fè rumor t' arpieghi ...

Par preghi

Badi sol malé

Che c'è tropp da fè

Tiri dritt d'acsé

Com un pertichè

Malé t'un cla majesa

Tiri 'na brega

Travers'el sol

"Signor! Vara che bruscia

se 'n piov 'na mucchia

sa magnarò?"

Adess l'ho capita perché

S' ridev me dicevi d'acsé:

 

Rid...rid.... en ridrann le vacch st'inverne!

 

INIZIO PAGINA

 

 

L'URBINAT

di Davide Mascioli

 

Bus ma 'na porta sa le chiav tle sacocc

cerch di madon da metta ma le rocc

romp i cocc, arvolt i lett e bugh i umbrell

trov parol che corrne e po' ch'en vann unvell:

                 el ciel è tel fond del poss

                 è pió fond de tut el mar

                 i' sput tel fond ma chel poss

                 e tel fond, tel ciel, cumpar

'na nuvla, el vent e piov gió 'na signora.

Dam la mana e gim du' vò

du' la sciensa dic "sa so!"

busàm ma cla porta e stam chiusi fora

 

INIZIO PAGINA

 

 

ARCORDAND URBIN

di Antonio Sanchini

 

En el so sa c'ho tla ment,

èn po' d' giorne che ce pens,

m' è nut voia de scriva un po',

de parlè el mi' dialett,

de pensè un po' ma Urbin

ch' ho lasciat ch'er guasi pcin.

En s'pò viva de ricord,

mo ogni tant me vien in ment

quant burdell giv a la scola,

de la festa di aquilon,

del mercat tla piassa dl'erba,

dla butega de Stifon.

I ann avansne e volne via,

i prim aciach en tutti i mia,

c' ne saria un gran bel po'

de sti bei ricord d'Urbin

mo è robba che fa mal

e te dà un dolor fin fin.

 

INIZIO PAGINA

 

 

LA DMENNICA

di Antonio Sanchini

 

Ogni tant el pensier me va malé,

è 'n chiod fiss, el so, sa ce poss fè?

A pensè da gì a scola el giorne dopp,

en t' nascond ch' me cascava el mond adoss.

C' alsavam tutti cuntenti a la dmennica matina,

ma San Francesch la messa, 'na visitina.

'Na passgiata ma 'l Pinc sa qualch amich

e spess se vdeva la cagnetta e Menelich.

A seda tutti t'i turion, 'na barzelletta,

'na risata e qualch schiafon.

Qualch festin cercavam d'organizè,

sa la speransa da poté tuchè

Le colett ch'avem fatt pr'un po' d' Martini

era 'na cosa normal, eravam sensa guadrini!

El temp pasava ed era ora da gì a cena

Arivavam a casa che babo c'era.

Ce guardava sa la faccia ùn po' incasata

E ce diceva: « Set statti in gir tutta la giornata!»

Cl' udurin de patat fritt e de fetina

c'arcordava la scola del lundé matina.

A la sera givam al bar a veda la television,

sa tutt le sedie in fila, che cunfusion!

Babo ce meteva tle man cinq sei monet

che dovevne durè fin ch' givi a lett.

Se giva a durmì sa chel chiod fiss del giorne dopp

i pensier s'afievolivne e se chiudeva 'i occhj.

 

INIZIO PAGINA

 

 

URBIN, SE' PCIN MO BELL!

di  Delfina  Scoglio

 

Urbin, se' pcin mo bell,

se bell com un gioiell!

Urbin, sa i tu' giardin

pensil, sopra le mura,

a guardai da luntan

fe 'na bella figura!

Se te guard da le Vign

pari un gioiell t'un scrign,

tutt ben incastonat

tel bel mezz del Creat.

Urbin, quant nasc el sol

pari 'na cità d'or

e quant el sol va gió,

tel sfond d'un ciel turchin

spicchne i bei turicin.

Urbin a primavera:

che fresculin de sera!

D'estat, se el temp è trist,

te riempi de turist

che lascne la marina

per fe 'na scapatina

e, insiem a l'aria pura,

respirè un po' d'cultura ...

Urbin: dentra le mura

c'è sempre un po' d'frescura

e tra i tu' vigulett

dà gust a fè un girett.

Urbin, pien de student

ch' pistne i pied ma la gent,

mo dann anca un po' d'vitta

ma sta cità anticca.

Urbin, chi te vol ben,

anca se part, arvien

perchè la nostalgia

è pegg d'na malatia

ch' la pò curè soltant

tornand de tant in tant,

anca se i tu' parent

en tutti ma'l Campsant

e da San Bernardin

guardne, per sempre, Urbin ...

 

INIZIO PAGINA

 

 

LA BANDA D'URBIN

di Luca Silvestrini

 

Quant'è bella la banda dla Capella Musical

e sopratutt dop le prov, quand se magna com i maial.

Appena el maestre cava la giacca

se sent Gigi che dic: "Chi dirig sta baracca?"

E sa sta fras cminciam tutti insiem a sonè.

C'è modi che io me distraggh e Franco me dic: "Bada malé!"

"Che pess se fa adess?" - me dic Gigi tutt incavlat

e io i diggh: "Zippy" e lò m'arspond: "Tutt sciapat!"

Quand ariva el giorne che tocca marcè

se cmincia pian pianin a sonè

sperand che venga ben almen una marcetta

e de non dimenticass de metta la bretta.

Quand gim gió da la Capella a la piassa

c'è Vanni che dic tutt incavlat: "Maché en s'passa!"

A pena fnim le cansonett

i primi a gì via ènn i flauti e i clarinett;

dop tocca ma i sasofne, le tromb e i trumbon

che da stè in piassa s'èn belli che rott i cojon.

'I ultim a gì via sém io e Franco sa'l pés  tla schina

e difatti la spalla ce dol da la sera a la matina.

Quand artornam tocca rentrè dal purton

e cum facem se c'avem tle spalle un carcason?

Dacsé, dà 'na botta in alt, dà 'na botta in bass

el strument en sona pió 'n cass!

            Invec, se gim a fè i concert

            tocca lascè tutt le porte apert,

            perchè io ho da pasè sa'l strument bon

            e guai s'el ciacch, s'no me tirne i madon.

            Tel fratemp c'è l'avocat che parla sa la ragassa ma'l telefunin

            E tutti no' i dicem: "Mo guarda che burdlin!",

            che quand è ora da sonè

            en sa pió do' gì a parè;

            fortunatament c'avém quei che venghne da la provincia

            e dacsé el concert incmincia

            pó, quand avém fnitt la nostra sonata,

            c'è modi che qualca persona s'è indormentata

            anca se no' avem sonat decentement

            e quindi de chi' atre en ce frega gnent.

Me dispiac ma ho fnitt la poesia

E adess sa'l vostre permess vaggh via.

 

INIZIO PAGINA

 

 

UN ANN IN BILICH

di Luca Silvestrini

 

L'ann scors, vers la fin dl'estat

m'ha prés el brill da fè le gran matat:

una de queste è stata da gì a giochè al palon

e la mi' mama ha dett: "Ostia, si cojon!"

So' partit ch'er pió d'un quintal,

so' arivat a novanta chil che en c'è mal;

m'ha tocat a cnoscia ben tutti i giocator,

mo en me so' arcordat che c'era anca l'alenator.

I credev che s'poteva fà quel ch'un i pareva,

invec tocava corra, bestemiè e pó en bastava.

Donca, en incminciati 'i alenament del campionat

ed ecch che el mi' bà s'è subbit incavlat,

difatti ló m'ha dett: "C'è la scola, la banda e el teatre,

adess c' è el brill da fè anca qualcos'atre?"

Alora i' me so difes e 'i ho rispost: "Tant el facc per me!",

e lò in quattre e quattr'ott m'ha mandat a cachè.

Dacsé a dicembre è arivata 'na bella boletta dl'acqua, a forsa da lavè i pann,

e le stecch che ha tirat gió la mi' mama sol Gesù Crist e la Madonna el sann.

Sta musica è durata fin a mars,

perché i' ho fatt quel che m'ha pars,

finchè quand el mi' bà ha vist che en giv ben a scola

me chiapava sempre per la gola

e da malé m'hann fatt smetta da fè tutt

fin quand a scola en ho recuperat de brutt;

difatti so' arivat a magg tutt ad un tratt

ch' avev recuperat 'nicò com un ragg matt

e finalment el mi' bà ha fnitt da rompme le scattle,

mo la mi' mama me stava ancora dietra com le piattle,

perchè en credeva che avev recuperat

e i' me so' subbit incavlat.

"Va a scola a veda i mi' vòt!" - 'i ho dett

e lia starnasava com un galett.

Finalment en scapati i risultati dl' Istitut

E lia è artornata a casa sa'l mus brutt,

alora 'i ho dett: "Com'è che si artornata acsé?"

E lia ha confesat: "Avevi ragion te!".

Dacsé dop un ann ingarbuiat

Ho fatt le ferie che ho meritat.

 

INIZIO PAGINA

 

LA BRETELLA

di Giorgio Speranzini

 

C' han cavat la Fan-Urbin

c' han ardott com un budin

el binari è ormai fnitt

pegg d'un chiod aruginitt,

prò in gambi, avevne dett

te farem 'na strada a gett

che, da vicin Calpin

tutta dritta porta a Urbin,

cinq minutt sa 'na cinqucent

sensa fè tutt chi lament,

dietra 'n camion pien de rena

ch' se strascina a malapena,

da Borzaga a l'ex Consorzi,

e vò veda, forsi forsi

la colpa è de nisciun?

O s'no è del Comun?

O di verdi consiglier?

O è dl' Anas cantonier?

Sentit un po', fattla fnitta

fat 'na strada bella dritta.

" Tutti insieme radunati

accontentate gli urbinati?"

Chiapat insiem 'na decision,

el bon sens me dà ragion.

Via le curv del secol scors!

Via chi doss da pront socors!

dit' insiem a 'n antre cent

la "Bretella" ... finalment!

 

INIZIO PAGINA

 

 

BAFUTT E LA BAFUTTA

di Giorgio Tiboni

 

Era pcin pcin,

secch e brutt,

s'chiamava Bafut..

Sempre in gir su per Urbin

sopratutt t' i vigulin,

propi com un pelegrin.

Sa le cals a spindulon

tutt mez sbutonat

c'aveva l'aspett d'un gran disgraziat!

Era un vagabondi patentat,

sempre vestit de scur,

portava tle man 'na padlina

ch'i serviva per gì a chiapè el latt

de prima matina.

C'aveva du scarp slabrat,

apuntit e tutt sfondat.

Era ner com un sumar

pien de baff e de capei

per quest el chiamavne "Bafutin".

Girava sempre com un can randag,

era stran come figura!

De ló i burdei avevne 'na gran paura

e fugivne com el vent!

En c'aveva nisciun mestier,

la gent el chiamava sol

per un gran brut lavor:

fè la barba mai mort.

I piaceva scovè le coppie,

s'nascondeva dietra i cepp,

t'le fratt, dietra i grepp

e tla macchia di Capucin

e da malé seguiva tutti da vicin.

Un bel.giorno per su' disgrazia,

è arivat ùn ch'en ne vleva tant,

l'ha chiapat per el gropon

e l'ha fat volè sopra due in amor.

Ha avut le sua!

Da alora stava atent,

era dventat prudent

e se guardava sempre intorne!

Spess per intimorilla,

dmandava ma la coppia

qualch soldin

in cambi del su' silensi,

s' no minaciava

de fè la spia

ma quei de casa d'lia.

C'aveva tle man anca un curtlin,

per fè paura ma chi i giva vicin!

Viveva sa la madre

ch' se chiamava Bafutta

portava 'na gonna nera

e, mezza sganganata com'era,

sbugava da la Voltaccia de' Valbona

e giva per Urbin

pogiata su du' baston

per armediè qualch guadrin.

Trist e guai ma chi en li dava!

Volavne i colp e le imprecasion!

Tutt le person ch' la cnoscevne,

la schivavne, perché dicevne

ch' faceva le fatur

o el malocch ch'è più sicur!

Lia viveva sai su' fiol

t'na casetta dla Piola de S. G'vann

Dopp 'na vitta tribolata

sta vechietta s'è malata,

s'è malata gravement e c'ha

lasciat improvvisament!

Bafutin è armast sol

com un can sensa padron,

combinava poch e gnent.

Qualch' persona l'aiutava

e dle volt el consigliava,

mo ló en dava ment.

Era dventat propi matt,

se spoiava tutt mezz nud,

sbotonava i su' calson

ch'i armanevne a spindulon

e dacsé dava spetacol!

Era dventat scandalos!

Tel manicomi l'han portat

e da malé en è pió scapat.

S'arcmandava sa i conoscent

de potell fè liberè,

mo en c'è stat pió gnent da fé.

Ha visut 'na vitta strana,

fatta sol de zironzana!

 

INIZIO PAGINA

 

 

FERANT

di Giorgio Tiboni

 

Secch secch, alt alt:

quest' era Ferant.

Portava 'na giachetta nera,

lunga fin i ginocchj,

rotta ti gommitt e tle sacocc.

Le cals, cort e sfugit,

érne propi striminzit!

El su' capell era gricit,

mezz rott e insustit,

sa 'na larga visiera nera.

En ha mai portat le scarp,

c'aveva du' bei piedon

e i bracc a spindulon.

Per quest su' gì scals,

sa'l temp bon e sa'l nevon,

la pell di' su' pied

faceva da scarpon.

Caminava, pendent in avanti

propi com la Torr de Pisa;

era bel e imponent

propi com chel monument!

Era de Canavacc.

Se spostava frequentement,

giva a pied;

tla machina rarament!

I chilometre ch'faceva,

érne tanti da man a sera!

Era bel ti giorne de fiera,

era propi un personagg!

Quant s'faceva l'ora d'pranz

girava per le ostarii,

magnava un piatt d' minestra,

un pess de pan e, fnit ch' aveva,

se rincaminava vers Canavacc.

La sera quasi d'nott,

arivava tel su' paesott.

E' visut com un primitiv,

era propi genuin!

Qualch curios el portava in gir;

mo ló en s' la chiapava;

nasicava la testa com a di':

"Badat a gì "

Era daver robust,

un bel omon;

la salut de ferr

l'aveva temprat al brutt e al bel.

La su' vitta,

era un bichier de vin,

un pess de pan

e gì in gir.

La gent i dava da di'

mo ló en i stava a sentì.

Caminava tel mezz dla strada,

e, quant sentiva un motor

se tirava tla cunetta

e malé s' fermava per la stretta.

Dop un po', sempre pendent,

archiapava a caminè,

sembrava che stessa per caschè,

alora faceva du' corsett

e dacsé argiva dirett.

Improvisament è scompars!

Ce s'era abituati al su' pasagg,

era dventat un personagg!

            Mo la vita, carini mia, è per tutti un pasagg,

            e tel gir d'un brev ragg

            è armast sol el ricord del personagg.

 

INIZIO PAGINA

 

 

QUAND SE DIC EL DESTIN!

di Anna Zazzeroni

 

Tel millenovecent e venti

quand se campèva sol de stenti,

era nèt dò femin t'un paesin

dicém, tra malé t'i d'intorne de Urbin.

            Tra de lor, c'era poch'or de diferensa

            e le famei stevne a ducent metre de distansa,

            tant che la levatric sa'n viagg sol

            ha fatt t'un tre or tott el lavor.

            Per chel part c'è stat propri 'na gran furtuna ...

            Aveva arfat la nott prima la luna,

            e ogni robba che s'aveva da gì a fè,

            niva ben ben a combaciè.

            Quand le dò donn c'avevne un po' de dolor,

            e se diceva già da chiamè el dotor,

            el vicin che aveva da gì a sfoiè i cartocc,

            invec dla treggia ha prés el birocc...

            prima da argì a chesa è pasèt ma 'l mulin,

            tl'osteria a fè qualch bichierin

            e pu' sbandand un po' maché e un po' malé

            ma la levatric è pasèt a chiapè

            e, cantand stonèt un'alegra cansuncina,

            l'ha messa a seda tra i sacc dla farina.

Da dentra le chès, dop de dò orle bei,

se senti', prima el piant di dò monei

e pu' a pochi minut de distansa:

«E' NUTTA BEN LA GRAVIDANSA

E' DO' FEMMIN SEN, SALV E A MOD...

MA LE MEDRE GITT A SCALDAI UN PO' DE BROD»

Mentre un di pèdre sotta el mor bateva la falc

e cl'atre taièva i rem ma la salc.

            La Gelda e la Checca, ste munelle,

            èn nutt sò, se pol di', cum dò gemelle;

            da pcin, insiem, a seda t'na balla sotta la vegna

            (en le sentiva nisciun se fevne la tegna)

            sporch sa la cacca tel polè dle galin,

            cupert de cendra davanti al camin

            mentre le medre per fai la ... merendina

            i brustichevne sopra el foch la farina.

érne ancora pcin e ... che vitta dura ...

a parè le pecre sa la paura ...

C' n'era una che scornèva a piò non poss

e tochèva stè atent a salvè  'i oss.

El temp pasèva e lor crescevne tra i stent

guesi mancheva anca el pèn sotta i dent,

e le scarp!? Se sa, sensa le sole ...

'i avevne cumprèt el quaranta, pore fiole ...

in prevision (penset che sveltessa)

che el pied sa 'i ann 'i crescessa ...

da 'st mo' érne siguri che en 'i stasser strett ...

(Oh! Quand en mort portevne el trentasett).

            La dmennica era el pió bel giorne,

            le mèdre fevne el pèn tel forne

            e lor sai vestit bon e el fasultin tla testa

            givne alla Messa per arcordè la festa;

            dop mezgiorne, i omne, t'l'eia, sai bichier del vin,

            giochèvne alla "morra" o a "santin",

            le donn arcuncèvne le balle rott,

            e le dò fiulin giochèvne "alla mamma" sa'n fagott.

'I ann givne avanti ... en érne piò dò munelle

oramai érne nut dò ragasse belle.

La Gelda steva sempre sfrustèta,

ti' spigle de' chesa steva pogièta

e se un ragass i fèva qualca mossa,

lia fugiva e niva totta rossa.

La Checca, se fèva avanti lia invec,

en importèva manca se el pèdre 'i alsèva la voc,

e quand la Gelda 'i diceva che era sprechèta

lia alsèva le spalle e 'i feva 'na risèta.

            El temp pió bell era el mes d' Maria,

            se fniva prest le facend per podè gì via;

            tla chies la Gelda preghèva e diceva la Corona

            e prometeva mal Signor da èssa sempre bona;

            e la Checca? Steva fora sai maschie ... che coragg!

            era totta 'na scusa el Mes de Magg ...

E sèm in temp de guerra

el rumor dle bomb feva tremè la terra ...

La Gelda sfolèta tra chi mont

ma quei de chesa i feva trovè tott pront:

un pess de pèn, un chèp d'uà e 'na maja de lena

... e intant Gino ma'l su' ba' 'i dmandeva la mena ...

lia purtina sempre bona e vergognosa

'i ha det de sè, da 'nì la su' sposa ...

cume dota dò lensoi e quattre stracc

... e la fatiga di su' bracc ...

            Intant la Checca aveva studièt ben ben i pièn,

            cume fè, per consolè i partigèn,

            e sensa fass veda da nisciun gió per la via,

            anca mai tedesch 'i portèva l'alegria.

            Era sempre ben vestitta e petinèta a pnell

            e tla mena i spicheva anca 'n anell;

            sa la borsetta e un prufum pregièt

            ... chissà chi gl'i avrà regalèt?

            El pèdre e la mèdre per un po' s'erne arabièti

            mo i bolor prest 'i erne pasèti

            perchè la Checca sa 'l su' lavurin

            arporteva a chesa anca qualch suldin.

E la Gelda sa fèva tel fratemp?

El marit cert en aveva pers el temp ...

Me pèr, cinq'ann era pasèt

e ... quattre fioi aveva "sfornèt".

Alla matina prest a dè da magnè ma 'l baghin

E pu' t'un chesa a fè tre foj de taiulin ...

Lèva, mogn le pecre, fa el forment,

pulisc i madon del paviment ...

un fiol casca, cl'atre c' ha i dolor

e intant va tl'ort a leghè i pondor ...

va a fè l'erba ma i cunei,

cusc le cals ma i su' bordei ...

gió per i camp a mieta el grèn

e de corsa a chesa che c'è chi ha fèm ...

            e voiatre dirét:

            « s'arposa alla not quand va tel lett »...

            Se Gino aveva but e s'era indormentèt

            se podeva dì che el pericolo era pasèt

            mo se era svegghj cume un merle

            se capiva che aveva voja dle zerle ...

            Lia i diceva « me dol la testa e me dol la schina»

            mo ló vleva fè cla facendina

            era propri un prepotent

            la Gelda se rasegneva e 'i diceva «sta atent»

            e gió 'n antre mes sa la speransa

            de en èssa incinta ... che soferensa!

            e comumque matina e sera

            Lia diceva sempre na' preghiera.

La guerra da un po' era fnitta,

... s'era persa la partitta ...

mo la Checca e el su' mestier

givne avanti che è un piacer.

S'era fatta totta roscia

se feva chiamè «chery» sa la erre moscia.

La su' tareffa en era alta, poch i bastèva

e la clientela en i manchèva,

anca dla guerra, purtini, i mutilèti,

lia 'i aveva contentèti.

C'era anca un vechiarin

ch' c' aveva un sacch de guadrin

fèva un po' la bèva ...

mo "porca palina" cum pagheva;

lia i feva quattre vers

ora per drètt, ora per travers...

ma ló l'aveva imbacuchèt

... dicem che s'era innamorèt,

tant che l'ha pensèta anca dall'aldilà

e 'i ha lasciet l'eredità.

Adessa la Checca

è una gran signora recca;

c' ha la chesa, c' ha i poder

en i pèr d'sigur el ver

e fina la vechiaia certament

en 'i mancarà mai nient.

            La Gelda, santa donna,

            s'è artrovèta nov fioi sotta la gonna.

            Intant Gino, che el Signor sia inglorièt,

            le gamb a cinquant' ann aveva stirèt

            e lia, tra nore, genner e niputin

            d'intorna a chèsa c'aveva sempre un gran casin.

            A setant' ann ormai sonèti

            (pensa quanti ann erne pasèti!)

            un po' de pèc en aveva avut mèi

            sol miseria, fatiga, dolor e guèi.

Ogg sotta l'ombra fa un pisulin

e ved arivè 'na gran signora sa'l cagnulin

«Oh! Mamma mia del Ciel

se' la Checca per daver!!!»

Tottle do' un abracc pìn d'afett

e se stregne fort ma 'l pett.

La Gelda, tel su' vestit trasandèt

sempre bella dop tutt quel ch'ha pasèt ...

            mo la Checca, è fatiga anca a spieghè,

            borsa firmèta, gioielli e scialpa de lamè,

            le men sa'l smalt, curèt e belle,

            la faccia liscia (avrà sigur tiret le pelle).

            Parlane e arcontne la lor vitta

            e, quand la Checca ma la Gelda la invitta

            a fè un gir tla su mèchina potent

            (me scordev, lia aveva prés anca la patent!)

            'i rispond sobbit «sé, va ben,

            è tropp bell artrovas e ste insiem»

            Eccle, partne in quarta accellerèta

            la mechina stranutta, prò va via de volèta,

            mo al prim incroc dopo d'una svolta,

            un po' perchè i rifless èn en pió cum quei dna volta

            e un po' perchè dai ricord s'en distratt,

            è sucess che tl'incroc i ha atraversèt un gatt

            tant che la Checca del volant perdeva el controll

            e tottle do' s'en git a rompa l'oss del coll.

            La gent d'intorna alle casett parlevne pianin

            «Quand se dic el destin!

            èn nèt insiem e insiem en mort

            guarda un po' che strena sort»

            'I hann méss un vestit uguel ... supergió ...

            un complet a giacca blu,

            un fasultin e un fior sopra el pett

            ... e le scarp ... el trentasett!

E tottle dò èn ma la porta del Paradis,

la Gelda sempre vergognosa fa un soris,

se pensa a cum la vitta l'ha pasèta,

de sigur sarà ricompensèta

e guarda ma la Checca e pensa che

sa totti i pchèt ch' ha da scontè

avrà da passè almen cent'ann

tra i torment e tra 'i afann.

Mo quel che è ma 'l cancell de chel giardin

s'avvicina ma la Checca sa un gran inchin

« finalment se' arrivèta

è da tant che sperèm tla tu' chiamèta,

cle animin ma là hann d'avè 'na ricompensa ...

hann scelt ma te e t'aspetevne sa impasiensa »

            Dop ma la Gelda che stèva sfrustèta

            sa tanta simpatia l'ha abracièta,

            l'ha portèta t 'na gran stansa

            e 'i ha méss 'na paranansa:

            « prepèra el the ma 'i angiulin,

            d'acqua tel prèt tott i fiurlin,

            ma là trovi 'na graneta

            per dè in gir una spasèta,

            e dato che sensa fè gnent en ce pu' stè ...

            ... quand la Checca ha fnitt fai un cafè ...»

Avém capit cum va el mond de qua ...

mo sarà da'st mò anca de dlà?