|
IV°
Concorso 2001 |
Tutti gli autori dialettali |
|
NINO CESARONI poesie |
Breve Biografia
NINO CESARONI nato a Urbino il 23/12/1919 in Via S. Lucia, ora residente in Giro dei Debitori, 6. Invalido di guerra nella campagna di Libia durante la II Guerra Mondiale. E' stato impiegato presso l'Ente Ospedaliero di Urbino ed è in pensione dal 1978. Ha svolto per molti anni attività orchestrale e ha fatto parte della Banda Cittadina e poi di varie orchesrine locali. Ha cominciato a scrivere poesie dal 1950 per diletto e senza alcuna pretesa letteraria. A tutt'oggi ha scritto più di 100 poesie in dialetto leggendole spesso in pubblico e partecipando a vari concorsi con esito favorevole. Nel 1979, con il Prof. Alfredo Zampolini ed altri, ha formato il Gruppo Dialettale di Urbino che ha pubblicato, nel ciclo di otto anni, sei libri di poesie di vari autori (Collana de I Quattre Vent ). Nel 1986 ha pubblicato in proprio ed in pochi esemplari un suo libro di 50 poesie dal titolo "To chiappa !", riscuotendo il caloroso favore del pubblico. E' iscritto all'Associazione Nazionale Poeti e Scrittori Dialettali d'Italia. Dettagli più coloriti sulla sua vita di Cesaroni si possono leggere nelle prime tre rime.
Lavori di Nino Cesaroni pubblicati dalla PRO-URBINO nella collana di "V' larcont in dialett": La nostra vita Segnalata e pubblicata nel I° vol. Concorso 1998 Ben tornata Fontanella Pubblicata nel I° vol. Concorso 1998 La maschera In Antologia I° vol. Concorso 1998 La società dla fam Pubblicata nel II° vol. Concorso 1999 Libertà Pubblicata nel II° vol. Concorso 1999 I artigian Pubblicata nel presente IV° vol. Concorso 2001 La fin del mond Pubblicata nel presente IV° vol. Concorso 2001 El coragg dla paura Vincitrice come prosa e pubbl. nel presente IV° vol. Concorso 2001 La pell dl'Ors In prosa, pubbl. nel presente IV° vol. Concorso 2001
Nino Cesaroni, 1986 In Antologia - IV° Concorso 2001
So' d'Urbin e facc el brav mo le cals prò en le lav se per qualch inconvenient me se sporca st'indument.
El cognom me fnisc in . . . oni, com quei ch'en a spinduloni. Nino invec è 'l nom mia mo 'n antre pess c' ne saria [1].
I mi' ann èn pió de . . . anta, c' ne vol trenta per novanta; so' in pension da qualch'ann, dop lavrat pió de trent'ann.
Stagh pe 'l Gir di Debitor, pró sa i buff me facc onor, in t'na casa alla mej quant s'ariva al numer sei, un po' a petta, al ripar, do' c'è Mengo, el calsular.
Per trent'ann sa la mi' moj ho spartit dolor e gioi, mo le gioi, per essa chiari, sa i dolor en vann al pari.
Prima ér un po' pió carnitt. Se adess so' sciaganitt è perchè 'na malatia m'aveva belle purtat via; m'hann arprés per i capei, c' n'è armast sol trentasei.
Me piacevne, quant er pcin, la chitarra e 'l mandulin, mo pió de tutt la pasion mia è stat sempre la "batteria".
Prò tel pió bell dle sunat ecch so gitt a fè 'l suldat a fè la guerra, per di mej, mo sém gitt t'un mar de guai.
Dopp ho arprés 'i obbi mia: el sunè e la poesia; mo sa i son en facc pió tant, sol tla banda ogni tant daggh du' sc'gnat t'i tamburlan, i "timpani", per dill in italian.
Mentre invec sa le strofett, ogni tant, per dilett, quand c'è un po' d'ispirasion e nesun t' romp i minchion, cerch da mettme in dispart per dè sfogh ma la mi' art. Quel è ùn de chi moment ch' so' felic e so' cuntent. Dop c'è le sodisfasion quant se legg ma 'n po' d'person che ascoltne sensa bacan e alla fin batten le man.
Prò cercat d' n'esagerè perchè quant me sent chiamè "poeta" e no per nom i' me sent, en el so com, dventè ross sa'n po' de stissa, perchè se per cas arnissa Dante, poeta eterne, ce vol poch mettme tl'inferne per fè roda sti quattr'oss ma cl'afamat de "Ugolino" e dacsé dopp adio Nino . . .
Urbino, 19-04-1952 Scritta e letta da Raffaele Zampolini In Antologia - IV° Concorso 2001
Qualch collega intrapprendent ha esclamat: « Finalment ! anca l'ultim arrivat dà l'addio al celibat. ».
Dop qualch més d'apprendistat, in tla pianta l'hann schiafat sia t'un vers sia t'un atre ló è a post com tutti 'i atre.
De caratter assai calm en s'arrabbia più d'un palm anch se qualca scampanlata par che sia un po' arrabbiata.
Un caratter propi d'or per la sposa un gran tesor che con tutta fedeltà ló contra-ccambierà.
Dattilografo velocissim sembra pió un direttissim sa chi ditta de qua e de là par ch'avessa da tastà.
'I divora i foj bollati 'i magna quei intestati, una sveltessa sensa scamp vien e va com un lamp.
Per fè 'n po' divertì la gent sona ben vari strument: la gran cassa, la batteria, i tambulan, la soneria. 'Na persona portentosa, l'allegria per la sposa !
Da Montecchj fin a Gadana, gió da bass fin alla C'sana chi en cnosc el batterista dalle moss caratterista ?
Sonator de grande vaglia en rifiuta la battaglia anca se per quattre cinqu' ser ha da passè nottate ner.
Vivet allegri e stat felici, quest è l'auguri de nó amici. Sensa perda un istant atacam chel bon spumant alla salut di du sposin e di prossim marmocchin.
Nino Cesaroni, 1991 In Antologia - IV° Concorso 2001
Giorni fa, sa'n ditta puntat vers noiatre, com fann 'i accusator; Ennio c'ha dett: «El dodic d'agost, m'arcmand, en ve diggh atre !» E dop avé chiest le spiegasion per sapé sa ch'era st'imposision ho capit ch' s' tratava d'un artrovass insiem de quei che stavne per 'na via che saria quella d' Santa Lucia. In più c'era anca da festeggià el ritorne dla sorella dal Canadà. Alora el pensier è argitt dietra tel temp, che tropp n'è pasat verament, perchè nó sem nati un po' prima, tel dopguerra, tant per fè la rima. Io so' nat da pied Santa Lucia, in t'na traversa ch'c'è tun sta via, in Via Timoteo Viti numer un e dop de quel en c' n'era pió nisciun. Più in là la Chies d' Santa Lucia sa Don Cesre e Don Astolfi, ai tempi mia. Dop c'era la famiglia Lucciarini sa du' gemell un po' birichini; Da cl'atra part c'è ancora la fontana do' spess ce bagnavam com i pesc per tirac l'acqua adoss sa 'na mana. Vicin la fabbrica di curtell, più in là el cinema. de Scarnicchia, e so' sigur ch'en v'arcordat da burdell d'una boteghina sa 'na vecchia pcina pcina ch'en vdeva guasi gnent chiamata la Tresina Gamba d'Argent. E pó per falla un po' più stretta, 'niva le osteri' dla Linda e dla Ciccia, do' se giva spess a fè 'na "foietta". E dand 'na sgrosata ma i ricord, gind só per sta via i' m'arcord del palass dla Pensierini do' affaciata c'era sempre lia ch' faceva 'na fumata. Piò in só la butega de Gagin ch' faceva el calsular e lavrava d' fin. Più avanti c'era quella de Polidori, che vendeva i gener alimentari, sa 'n odoracc ch' se sentiva da fori ch' c'aveva de stantì, per essa chiari. Pó c'era quella d'Alfredo el mecannich che spesse volt i scapava el mannich, ne sa qualcosa l'Adua sa i fratej e ma la Lisena en è ch'i giva mej; nó prò el chiamavam "Cagon" perchè giva spese a falla dietra el turrion. Mo quant c'aveva l'umor bon metteva la butega a disposision: arcomodava tutt, anca i mutor perchè era propi brav t'el su' lavor. E propi vicin a chel "volton" c'era la butega de Stifon, 'n antre brav artigian d'Urbin ch' faceva le bott, le mastelle e i tin; e quant en giva a giochè alle bocc faceva anca le rôt per i birocc. Per sti lavor l'aiutava sempre Pipusin che più dle bott s'intendeva del vin ... e l'osteria ch'era propi de front sa questi c'aveva un bell tornacont. Non tutti v'arcurdat de Cecch e de Clement, i unich "bus" ch' c'erne in chel moment, fatti de carossa sa i cavall e sa du' sold te portavne al Gall. C'era parecchi "sgnor" tun 'sta via, padroni di palass d' Santa Lucia: Gambarara, Pensierini, Carloni, Scoccianti, Moni, Mulazzani; per en dì pó del Palass Albani, Marra, Giulianelli e Calderoni. Tra 'sti palass ce stavne anca i purett in certe casacc brutte e all' istrett; a dì de tutti me ce vrìa un volum e poss anca scordam de qualcun .........................................................
Nino Cesaroni, 1970 In Antologia - IV° Concorso 2001
C'è in Urbin un personagg caratterista sa 'na faccia ch' te fa rida a prima vista, quant parla e pó è anca pió gignal, sa 'n dialett del tutt original: per dì "sêm gitti " ló te dic "gismi", per dì "eravam "ló te dic "fosmi ", per dì "ossia" te dic anca "vienessa", e se qualcun rid, ma ló en interessa.
S' i dmandi el nom te'l dic sa sta strofetta: "Lelli Luigi, detto Dottor Garetta, Carlo Erba passata la mezzanott, e dop le due Lelli è belle cott, forse, ma non sempre, perchè ve' l dic Lelli che "ormai son finiti i tempi belli". Da ste strofett certament avret capitt ch' i piac da beva e magnè cunditt ...
Mett só la bavarola prima d' magnè ch' porta sempre sa ló, en se vol spurchè. A vedle a magnè è 'n divertiment, magna de tutt, en scarta mai gnent; c' ha 'na dentiera, quant apra i labbre, ch' par la butega de ùn de chi fabbre. 'Na volta ha dett ch' a forsa da magnè s' èn stufat le ganasc per mastichè, e l'ost stanch da portai el vin 'i ha mess 'na damigiana sopra 'l tavlin ...
Quant canta c' ha 'na voc baritonal, i piac d' cantè e canta ch' en c' è mal benché sia alt - e questa è propi bella - l'hann mess a fè 'l "bass" in t'la Capella.
"Caretta" è 'n sopranom derivat che forse ma su' padre l'hann schiafat, e quest faceva anca el carettier, carett e cavall erne el su' mestier. Gigi invec sotta el Comun ha lavrat, faceva el spasin motorizat; mo a dì dacsé ogg en è pio loggich, se chiama: "'Operator ecologich"... E' donator de sangue "Goccia d'or" e sa le donasìon s' è fatt onor.
Richiest da tutti per tiena só el moral, sa i su' cant e storielle original: fatti vera che ma ló èn sucess e quant 'i arconta rid anca ló stess. Com de chi due che ch'avevne 'na faccia propi com el color dla vernaccia; Gigi schersand glj ha dett. Ùn 'i ha rispost: "Manca vo' en set cott in bianch, piutost ! ..." S' èn messi tutti in t'na gran risata, e tutt è fnit sa 'na sbicchierata.
'Na volta è gitt a Fiuggi sa 'n parent, tutti beveven l'acqua e ló per gnent, mo dop un po', per onor del ver, n' ha bevut anca ló qualchi bichier; pró dic che 'l stomoch ha dacsé brontolat: "Sa c'è ogg l'alluvion ?" 'I ha dmandat.
Quant a casa nessun pió 'i parlava, faceven "scena muta" quant s'magnava, pró dop qualch giorne ló s'è stufat, e battend t'un bichier "Il conto" ha dmandat. Anca malé è fnitta t'na risata e la pac in famiglia è artornata.
Ma 'l Presid dla Scola del Libre l'ha chiamat "Colega" perchè 'i ha dett che anca ló è Presid dla Scola del "Litre"...
Hann dett ch' c'è Lelli cott ... tel camp sportiv, invec l'ho vist in piassa: era giuliv; mo se ved ch' c'è statt qualch fagott ch' ha prés l'elicotter per Lelli cott. Se 'i dmandi se sti fatt en vera o no, te rispond sol sa sta fras: "Lo saprò !"
Adess io v' n' ho dett sol qualcuna, mo ogni giorne c' ne sarìa una, perchè ma ló i venghen sensa sfors, spontaneament, in t'i su' discors.
Quest è Lelli Luigi detto "Caretta" dalla parola semplice mo schietta, Re del bel cant e del bon umor che guarisc ogni mal, mej d'un dottor ... E, tant per ripeta 'na fras sua, ve digh: "Tira gió sta coppia d'ua !..."
Nino Cesaroni, 1979 In Antologia - IV° Concorso 2001
E' qualch'ann che in Urbin hann asunt di pisardon, 'nut da Schieti e Cavalin, a regolè la circolasion. Un giorne ariva un forestier e dic ma un d'lor:: «Per piacer, per gi' al Stadio do' se passa ?» Ló se mett a testa bassa . . . un vicin 'i ha sugerit: «Vol sapè del Camp spurtiv !» E ló, tutt rinvigurit, cmincia a dai le spiegasion: «Qui vicino volti a dritta, pó va in cima la salitta, quant è sotta chel volton, pôl dmandalli ma Stifón, che s'en gioca alle bocc, fa le rôt per i birocc.»
N' antra volta, sempre un d' lor, giva in gir per n'ispesion, quand ha vist in t'un canton, una mucchia de cartacc, per el vigol dle Stalacc. Se méss subit a indaghè per sapé chi era statt, pó ha incminciat a muscinè tra cle cart, pareva un gatt. Finalment legg el nom d'un e corr subbit ma 'l Comun Pó s'è saput pió tardi, ch' era Giacomo Leopardi.
Un tal t'el Mercatal sa 'na gran prescia, ha chiest ma 'n vigil, ch'magnava la crescia, dov'era el Vespasian pe 'l su' confort. Guardandi fiss e masticand pió fitt, per poté mandè gió l'ultim bocon, 'i ha dett: «Ste nom en l'ho mai sentitt ! bsogna ch' me dic anca el cognom, Mo quand chel tal i ha fatt capì sa era, alora en i è pars propi el vera, de potei dà tutt le spiegasion, sa 'n italian pién de sfondon «Chel vagga só da monto in tla salitta, facét qualc'atre pass gió da vall, entrat propri de front alla Zitta; malé el vostre comod el potet fall!» Prò quel, sa tutt chle spiegasion, ormai l'aveva fatta t'i calson !
Un tal ch'aveva chiest da visitè la «Galeria», sapet dó l'hann mandat ? Tla Ferrovia ! Ma 'n antre ch'vleva sapé l'ora d'partensa dla corriera ch'a Peser era diretta, 'i ha dett: «En el so, avét pacensa, prò so' sigur, e ve 'l poss prometta, che part un'ora dop de quella d' Fan». «E quella d'Fan quant part?» Chel tal 'i ha chiest. «O questa è bella !» I rispond st'vilan, «se vlet gi' a Peser sa v' interessa d' Fan?»
«El Palazzo Ducale é del Laurana ?» 'I hann chiest ma 'n vigil de Gadana. «No! E' del Comun !» 'I ha rispost quest, ........................................................... acsé d' fregnace ha rimpitt el cest.
Nino Cesaroni, 1990 In Antologia - IV° Concorso 2001
Quant c'era i spasin a pulì le strad la mundessa in gir se vdeva d' rad. Sentivi a bonora la matina el rumor dla ramassa che strascina, el sbatroccolè dle pal e cariol, o sgambiè qualca parola sa'l lattarol; el nostre ch' faceva anca el cantant, acenava qualch motivett ogni tant. Per ogni strada e ogni vigulin c'era disponibil el su' spasin; ma da quant 'i hann gambìat la "dicitura" en sparitti dalle strad adiritura. Quant un se chiama "Operator ecologich" de spassè per terra en è pió logich ...
Nino Cesaroni, 1978 In Antologia - IV° Concorso 2001
T'el millenovecentquarantasett, 'na squadra de ragass, chi pió purett, sa 'na cariola, un badil e un picon, han spianat un mucch d' terra sotta un torrion.
Dalla lor fatiga e el lor lavor è nutt fora un local dett el Ragno d'Or: una pista da ball all'apert. 'Na bella inisiativa, quest è cert, per el svagh dla gent e di student, chè in Urbin en c'era propi gnent.
Atacat c'hann fatt el bar e 'n gran camin, per fè le cresc sfoiat, specialità d'Urbin. 'I artefic de st' lavor èren parecchi, èrne giovin, mo en dventati vecchi.
Piò de trent'ann n'è pasat del temp, ansi qualcun en è pió present … Per di qualch nom di pió cnosciutt: Barabin, Gig Caretta, el Canutt, Tino Amati, Alfio Succa, el Fantin, Chiopali, Perugini e Cirigin, Piergiovanni, Cecchini e Marangon, e tanti atre che adess me sfugg el nom.
Basta a dì ch'erne ventisei e han cercat de fè sempre del lor mej per poté mandè avanti ste local ch'era un vant per la città Ducal.
Mo giorne fà, andand a spass pian pian, ho sentit da cle part un gran bacan: c'era 'na ruspa che spacava tutt. Poch lontan da malé c'era el Canutt, apogiat t'un tavlin, mezz avilitt, 'i ho chiest le spiegasion, m'ha dett: "Sta sitt.
Se vò parlè en tochè ste tast, è un pess che c'ho el sangue guast». E pó, seguitand tramez ai dent, ha dett: «L 'hann arprés chi prepotent, dop trent'ann, ansi trentun, l'han arvlut chiapè quei del Comun». Sa ce vlevne fè , 'i ho ardmandat. «I gioch dle bocc per i disocupat !» m'ha dett e pó è gitt via tutt indiavlat, perchè dal bar qualcun l'aveva chiamat.
A sentì i discors de ste porett, anca ma mè m'ha fatt un cert efett, arpensand ma'l temp ch'era pasat, perchè anch i' parecchie volt c'ho sonat
M'arcord ch' 'niva sempre dla gran gent, specialment d'estat, pién de student; anca de fori la gent se divertiva: magnava el g'lat e la musica sentiva.
E pó lor s'contentavne de paregè, en l'han fatt sa'l scop de guadagnè; vlevne fè sol divertì la gent, tutt el rest en 'i importava gnent.
Invec ai mi' temp quant se balava, dle sal in tla cità en ne mancava: da Belpassi, al Tordinon e al Mercatal, sa quattre sold, giravi tutt le sal.
Adess che c'è anca pió esigensa di local da ball sém armasti sensa, acsé la gioventù se vol balè da Urbin i tocca emigrè, perchè se stann maché tl'interne en balne nè d'estat e nè d'inverne.
Che bsogn c'era di gioch dle bocc malé ?! Tropp c'ne del post, bastava cerchè ! Mo un tal, che a parlè en i rincresc, dic: «Ma qualcun 'i fa mal el fum dle cresc el fum del foch che tocca mettle a gass, c'è anca un pess gross ... ch'en pol sentì el chiass ».
Com se alle bocc, quant fann "resta per sei", opur per ott, sia qualcò de mej ... E' 'n gioch ch'è fatt sol per i ansian, la gioventù en va a sporcass le man. Per dilla schietta, e quest ormai se sà, se balla sol t'la "Festa dl' Unità". E la cricca del Ragn d'Or, allegrìa dla città … sta canson ch'era la lor, pió nisciun la cantarà.
Nino Cesaroni, 1980 In Antologia - IV° Concorso 2001
E' qualch giorne che in Urbin tira un vent indiavlat, l'ho lett anca tel "Carlin" ch'ai cent all'ora ha tirat.
Per le strad 'n arbaltaticc: vola le cart, vola i carton, i ram dle piant sa i brancon, de copp e vetre un scrociolaticc.
Vola el capel ma qualch vechiarell, ch' en ha fatt a temp a tienle dur. Fa el chiass 'na cola rotta a strascinón tel mur.
S'rugula per terra un barattol d' latta mentre fugg spavritta 'na gatta. I pal dla luc, tla strada, fann la staccia e i nuvolon tel ciel se dann la caccia.
Casca le antenn, casca qualch camin: (è sucess anca ma 'l mi' vicin !) se givi contra vent se faticava; invec tocava corra, se t' calsava.
El da fa ch' c'avevne cle por donn per tiena gió bass le lor gonn, mo el vent schersós i girava tond e faceva veda anch' qualch mappamond.
Ma ùna, ch'era statta dalla parrucchiera e vleva fass veda armulitta, 'na ventata l'ha scapciata tutta: era bionda, mo è dventata nera !
Le piant cle gross se scrulavne tutte, mentre le pcin te facevne l'inchin, e qualcuna en li faceva pió ad alsass perchè la "testa" aveva batutt ti sass.
Le foj secche amuchiate t'la cunetta cmincen a fa el birell, par ch' ballen la "scarpetta" o el " saltarell ".
La gent va via svelta, par ch' ha prescia, com se a casa se brusciassa la crescia. Qualcun camina un po' distant dal mur ch' en 'i caschi un copp tla testa è pió sigur.
A Urbin, quand tira el vent, essend in t'na colina, en fa tanti cumpliment, specialment s'è la "sciorina".
E quant el vent pian pian sarà calat, i nuvolon chi grossi avrà ardunat, alora el cél incomincia a brontolè e la pioggia fitta fitta a caschè.
Vien gió a catinelle e a bidon mo a Urbin en c'è paura dl'aluvion, sém in alt e ha da piova i més per veda a 'nì só a galla ma i Psarés. Se dic che Urbin è la cità del sconfort, mo è mej ch' piov e tira vent piutost che soni a mort …
Nino Cesaroni, 1991 In Antologia - IV° Concorso 2001
Per nó d'Urbin è 'na tradision, sia per chi tristi che per chi bon, rispettè el Lundé de Pasqua, anca s'acqua o nev gió casca. Grandi, pcini, donn e ôm, gim a fè 'n gir tle Grott del Dôm; e pó dic ch' c'è l'indulgensa, dachsé da gicc en s' pol fè sensa.
Da qualch ann prò, a dì al ver, en pió de nó i forestier: sarà l'apatía de nó urbinat opur perchè qualcosa è cambiat: 'na volta era tutt pió accoglient sa "Ciccio" ch' faceva el dirigent, perchè s'en giravi pe'l su' vers, dalla gent ch' c'era, te truvavi spers.
E pó era tutt pió arpulitt, adess c'è le statue èn tutt' insustit, piene d' polver, 'na pussa d' rinchius, che ma tutt quant fa griccè 'l mus. Ce vleva tant daj 'na pulitta ? Posibil che ancora en l'hann capitta ? Anca l'ann scors l'hann méss tel giornal mo quei testardi fann sempre ugual; e pó malé èn conservati di capolavor tel mond rinomati.
In Urbin c'è propi la mania d' lasciè le cos achsé com sia: pó di lavor lasciati a metà per ann inter, c' n'è in quantità.
La scalinata del Dôm è a ristrett, el palass dla Finansa è sensa tett, la fortessa Albornos chiusa da'n pess, la casa dle Vign sempre lustess.
Hann arfatt el mur a son d' milion mo ancora en s'pò gì tun chel turion. La statua del Papa è sensa 'n bracc, quella de Raffaell è ardotta un stracc; guarda sotta le logg el piancitt è tutt impatacat e sempr' insustit.
Mej lascè gì per non dì cle pió belle: cioè di parchegg e dle gran "bretelle", mo in attesa de cl' occasion strigném la cinta s'no c' casca i calson ...
Nino Cesaroni In Antologia - IV° Concorso 2001
Sta matina un gran chiass ho sentit gió per cle piass: "E' saput quel ch'è sucess? s'en el sè tel digh adess: ma là, dop el scond turion, è git gió el mur a rugulon !" I giornal, la Tivù fann a chi ne sà de più, tutt' Italia ha saput de ste mur ch'è cadut. Per nó en è 'na novità perchè ormai è un pess ch'se sa ch' c'era el mur pericolant, ch' l'hann vist tutti i pasant; ansi hann vist quel e atre andand otra dal Teatre. Tun ste mur di temp antich ce nasc de tutt, perfin un fich, ch'i ha fatt fè 'na gran pansa sopra l'Ort dl'Abondansa. Era 'n pess ch' s'aspetava che ormai ste mur cascava. "Era ora ! ‑ dic qualcun - e speram che tel Comun adess se dìen un po' da fè !" Mo c'è poch da sperè, perchè sti Cap interne dann la colpa ma'l Governe, el Governe ma'l Comun e dachsé en fa gnent nisciun.
Urbinati en v' la chiapat se 'n pess d' mur è cascat, se anca Urbin va gió tutt, tant ormai è risaput c' ne fann un nov (en è le ball ! ...) ma là gió de sopra el Gall.
Nino Cesaroni, 1995 In Antologia - IV° Concorso 2001
Finalment se véd Urbin circondat da le su' mura ripulitte per benin da tutt chi bosch e cla verdura, che cuprivne ste cinturon fatt de mur e de turion.
A vedla adess è 'na blessa sta cintura d' madon antich, ch' dava vant e sicuressa ma Urbin e ma Fedrich, che partend dal su' palass per le mura giva a spass.
A cavall tel su' destrier giva só vers la Fortessa sa l'aria da guerrier, a ispesionè la soldatesca, perchè c'aveva la mania d' fè la guerra ma chi sia.
P'rò adess se vò girè tutt intorna ma ste mura c'è di punt ch'en s'pol passè perchè occupati adirittura da privati cittadin sa ort, capann, giardin ...
Mentre invec sarìa 'na blessa ripristinè el caminament dal Palass alla Fortessa per fè in mod ch' passi la gent, ch' vol gì a veda chel coloss dla Fortessa d'Albornoss.
Nino Cesaroni, 1986 In Antologia - IV° Concorso 2001
I gioch d'na volta quant'eravam burdei, quant giva pegg e forsi andava mei, quant se cantava che poté avé mille lir al mes era 'n bel campé, c' n'era 'na mucchia e a poch press, e forsi èrne mej de quei d'adess: cut, chiapparella, scaricabott, la bella insalatina. I fagott facevam sa le belle statuin e pó dop cminciavam sa le palin. Sa quelle se facevne tanti gioch che messi insiem en duravne poch: cioda, pancott, buticchio, castlett, battmur, sergent e atre giochett che a vlé dè tutt le spiegasion ce nirìa fori un bel libron.
Invec le burdelle in dispart giocavne sa 'na bugatta a fè le sart; favne le righ per terra sa'l gesett per giochè a campana sa i sompett.
Se podevi spenda qualch centesimin givi dal Diavlett a comprè 'l frulin e sa 'na frusta fatta alla mej: era 'l divertiment de nó burdei a fe girè ste frull in tel selciat ch' girava a forsa de frustat.
Dop c'era el cerchj de legn o i cerchion ch'se mandavne avanti sa'n baston o sa'n pess de sbranga fatt a rampìn e gió a corra tle strad e i vigulin; prò ce vleva 'na certa abilità per tieni dritti sensa fai cascà. (I burdei d'adess calsne un buton e guardne chi pupass com i minchion ...)
Dop se giocava sa la tavletta, ch'era come ogg la rachetta, la palla era sempre de pessa e quant'era d' gomma era 'na blessa. Mo se giocavam in tla piasetta c'era sempre Canapin o Muscon a petta, du' guardie d' piassa sempre alla grilla per cerchè d' portac via la palla.
Dle volt se giocava anch'al palon, 'na mezza pscicca sa poch cuperton e no' ch'eravam d' Santa Lucia givam for Porta, d'là dl'osteria; mo se per scarogna giva d'sotta, se 'n s' fermava tla cunetta, giva gió vers Che Palotta ch'sarìa vers le part del Tir a Segn, per essa chiari, sensa dì le fregn. Mo nó givam de corsa a chiapall e, artonati da cima, stirava 'l fall. Dispess giocavam sa'l birucin, gió tle discés, ch'en manchen in Urbin. Tutt fatt in casa sa quattre legn sensa progett e sensa disegn; era fatiga sol a fè le rôt ch'invec de tonde nivne mezz quadrat.
D'estat, quant c'era el sol leon, giv a la Burzaga o ma Bracón, ch'en era cert du' stasion balnear, ma sol da grandin s'è vist el mar !
D'inverne quant faceva chi nevon, che dle volt cuprivne anca i purton, s' faceva i bugatt, le palutat, la liscia sa le scarp sotta 'l lugiat, o s'giva for Porta sa la slitta fatta sa quattre pess de tavletta, che tocava tiralla per gì só e spess en giva manch per gì gió. S' fava i butacc quant curinava, 'na diga d'nev dó l'acqua scoreva, quant era piena facevam "cacon" e l'acqua giva giò a gultilon squaiand tutta la nev per cle discés, un gran divertiment sensa pretés.
Nino Cesaroni, anni 90 In Antologia - IV° Concorso 2001
Se'l medich te prescriv 'na medicina per la tossa o pel mal de schina, chiappla subbit sensa tante noj perchè se vè a leggia t'un chel foj ch'è tla scattola per le spiegasion incmincen subbit le preoccupasion. Fra avertens, contr'indicasion, efett colateral, precausion, t'vien dett: « Quest en è un medicinal mo un missil intercontinental !» Alora per tirè le conclusion butaresti tutt in tel bidon.
Nino Cesaroni In Antologia - IV° Concorso 2001
Guardav 'na sera, sol e solett, la luna piena prima d'gi' a lett, a pansa sopra sdraiat t'un prat amirav st'opra ch'ha fatt el creat. E mentre guardav st'astre splendent facev intant qualchi coment. Quante canson d'innamorat, quante person de te han parlat! T'han tinta d'ross, de verd, de chiar, t'han méss tel poss, e butat tel mar; anca tel rio t'han butat sti matt e vleven sapé chi era stat. T'han dett bugiarda e ficcanasa, che dventi pallida e pó scontrosa, mo se' lunatica, è evident che non po' essa diversament. T'han mess tla faccia de tanta gent, e tle sacocc de chi en c'ha gnent, te fan passè per chi è ignorant, t'han fatt crescent e pó calant. ...................... De tutt ste cos che dic la gent ma t' en t'importa propi per gnent, e sempre arluci de nott tel mond anch se 'na nuvola dle volt te nascond.
Nino Cesaroni In Antologia - IV° Concorso 2001
El sol è già stat ingoiat dai mont, tra i sass d' San Simon e la Carpegna lasciand un strascich ross all'orizont, sta scena d'un pitor è propi degna. Se fa sera, s'oscurne i canton, s'archiappa la via d' casa lentament, s'acend pian pian le luc de chi lampion, del giorne ch'passa prò en so' cuntent. E' sempre un d'men da podé campè e anca se t'un st'mond c'è poch da goda te tira el sacch da dovel lascè, mo purtropp c' n'è armast poch da roda . . .: En è per i ann ch'en sarìen tanti, anca s'ho prés la "via discendent", mo è aciacch e pensier ch'en tanti e che dle volt te levne i sentiment. Me tocca caminè un po' mezz tort perchè i snod s'en aruginitt, so secch arplitt ch'me rid el beccamort, sarò cinquanta chil sa i mi' vestitt. En c' vegh pió tant, me ce vol i ochial, so' mezz sord, me ce vol la dentiera, tocca fermam quand vagh só per le scal, è segn ch'anca per me se fa sera.
Nino Cesaroni In Antologia - IV° Concorso 2001
M'ha dett mi' moj, sa na faccia seria, che a casa nostra c'è una miseria che da un po' d' temp è dventata nera, è per quest che lia se dispera. J ho rispost un po' meravigliat: "Mo i sold ch' t'ho datt en t' hann mai bastat ? Sa vol dì adess st' ragionament ? E' sempre dett ch'en mancava gnent !?" "Sa ch'è capitt ! - alora lia m'ha dett - En è minca la miseria di purett ! Vedi malà chel vas sa cla piantina, ch'i dagh 'n' adacquata ogni matina ? E' quella la miseria che t'ho dett, mo te capisci sempre per dispett ..." "O porca dla miseria adiritura ! Ch'sa metti paura per un po' d'verdura !
Nino Cesaroni In Antologia - IV° Concorso 2001
Una volta, quant er pcin, me dmandavne se in Urbin c'è pió disces o pió salitt. Io stav un cuncin sitt e pó sensa tant lunari rispondev che erne pari. Mo se me 'l dmandne adess rispondria ch'en so' fess, perchè ormai ho già capitt ch'en men le disces dle salitt. E ma chi me dic de no i dirìa provat un po' t'na pendensa a gi só e gió el vedret dó c' vol de pió.
Nino Cesaroni In Antologia - IV° Concorso 2001
'Na volta s'diceva "cumpagn" per di amich opur s'diceva "amich" per di cumpagn, mo da quant è arivat i Partit i amich en en pió cumpagn, e i cumpagn en en pió amich. Prova a di "amich" ma 'n Comunista opur "cumpagn" ma' n Democristian, ùn t' manda 'n acident a prima vista e cl'atre fa 'l segn dla Croc sa le man; e tutti dó predichen l'uguagliansa, la pac, l'acord e la fratelansa !
Nino Cesaroni In Antologia - IV° Concorso 2001
Padre nostre ch'se' malasó te pregam per tutti nó Te che gverni dal tu' Regn fa che Urbin ne sia degn. Fa pur com t' par ma te, mo de nó en te scordè; sia tel cel che tla terra ce sia pac e no la guerra. Dacc ogg un pess de pan ch'el companattich l'armediam; paga i nostre debbit, Signor, specialment ma quei del Gir di Debitor. En c' fè 'nì chi pensieracc, che c'arduc'ne com i stracc, e guarisc tutt chi mal che non basta l'ospedal, specialment ùn com el nostre: mo c'vol sol el Paternostre. E speram che dacsé sia, tien a ment e così sia.
Nino Cesaroni In Antologia - IV° Concorso 2001
Per chi el parla: è 'n piacer, per chi l'ascolta: un mister, per chi el scriv: è 'na festa, per chi el legg: un gran mal de testa.
|