|
Poesia vincitrice
'NA
POESIA PCINA PCINA.
Alessandro Sanchini
Prima classificata - IV°
Concorso 2001
Ho voja de scriva 'na poesia pcina pcina,
che stessa in t' una mana sola
o drenta 'na sacoccia.
E vrìa che quand d'inverne
buffa de brutt e la tramuntana tira,
la mi' poesia me facessa cumpagnìa.
Ho voja de scriva 'na poesia pcina pcina,
pcina com i bascìn che dava marna
o com chel verzulìn che me svejava la
matina.
E vrìa,
che quand so' stuff e c' ho 'l magòn ma'l
cor,
la mi' poesia dventassa 'na caressa
d'una burdella ch' me vol ben.
Ho voja de scriva 'na poesia pcina pcina,
che stessa in pied in t'una viola
o sopra el spruss d'una funtana.
E vrìa,
che quand un giorne
me tocarà partì,
t'la mi' sacoccia e t'el mi' cor,
la mi' poesia sia sempre lia.
INIZIO
PAGINA
Poesie segnalate
EL DUBBIE
Daniele Ambrogiani
Segnalata - IV°
Concorso 2001
Da quand me so' avilitt
vel voj metta per iscritt
che quand facc' le patat fritt …
me se vogn tutt el piancitt ...
Cl' atre giome er un po' aflitt
t'la cucina stav sitt sitt
vaggh a preparè el cunditt
me s' arvogn tutt el piancitt …
N' antra volta incuriositt
mentre staggh a fè el sufritt
me sentiv ringalusitt ...
en avev vont el piancitt ...
Quindi tutt rinviguritt
facc' du' salt, vaggh a gamb ritt
t'la padella sa du' ditt ...
facc' caschè tutt t'el piancitt ...
Cl' esultansa ma traditt
brutt teston imbarbugitt
ma tutt' ora en ho capitt ...
se me so' rincoionitt ...
INIZIO
PAGINA
OGG T'EL MI'
ORT
Antonio Fontanoni
Segnalata - IV°
Concorso 2001
Ogg t'el mi' ort
c'è 'n gran vent fort,
tutt le piant èn contort:
i ram se pieghen
e arvenghen,
s' inchinen
e s' argiren.
Tutt è tormentat
agitat.
Anch' el cilieg
ondeggia a pió riprés.
Se piega e se difend,
se rincicola e protend,
s'inchina e pó ardventa dritt
com se tutt fossa fnit.
Pó arcmincia la su' balata,
sa i ram tocca guasi l'insalata.
S'argira e arvién só
e io facc com fa ló.
L'accompagn t'el moviment
che i fa fè el vent
e cerch da capì
cosa i vol dì
perchè anca ló è tutt agitat
e se lamenta a perdifiat.
INIZIO
PAGINA
AVRÉT PASIENSA
Carla Galli
Segnalata - IV°
Concorso 2001
S'arabbia spess,
se bev tropp vin,
tocca dai ragion
com ma 'n burdell p'cin.
En gì d'accord
de sicur dispiac
almen sa quei d' intorne
se dovrìa stè in pac.
Valla a veda perchè
sa l'età è peggiorat
qualcosa dentra
'i se sarà argirat.
Prov a capì ste
degrad di sentiment
dacsé giustifich
anch' el mi' comportament.
Sém com i birill
c'è chi resist de pió
mo prima o dopp
tutti cascherem gió.
Allora en me lament
e ringrasie la vita
ch'ma accompagnat
anch' in salita.
I ann creschne
en se va per el mei,
avrét pasiensa s'argirà
t'i pied di burdei.
INIZIO
PAGINA
VRÌA
Silvano Marcucci
Segnalata - IV°
Concorso 2001
Vrìa fè le cerquarit
com una volta.
Vrìa fam mal
come quand, per consolàm,
mi madre m'ha riempit de basc ;
e abracè mi padre
com facev quand artornava dal lavor.
Vrìa gì a scola com el giorne
ch' ho prés nov in italian
e artornè t'la pineta dle Vign
dov ho dat el prim basc
ma 'na ragassa.
Vrìa giochè al palon
come quand ho parat un rigore,
e veda el Péser perda sa l'Urbin
per trentadu' a zero.
Vrìa essa felic
com el giorne dla fin dla guerra
e prenda a schiafon
ma chi ancora le provoca.
Vrìa che saltasser de chiop
tut le mine sparse per la Terra
e che qualca scheggia
s'infilsassa t'le chiap
de chi c' ha speculat.
Vrìa veda el Cont Ugolino,
e tut j afamat
davanti a 'n piat de pastasciutta.
Vrìa che l'aquila de pietra
in mez ai Torricin
facessa ogni tant un volèt
sopra la città e pó artonassa al su'
post.
Vrìa guardè dal Mont dla Conserva
el panorama tut intorne,
aspetè ch'se faccia nott,
artornè in Urbin
e gì a sentì a cantè l'usignol
t'l' Ort dl' Abondansa.
Vrìa vrìa vrìa ...
INIZIO
PAGINA
EL PAN SA L'UA
Delfina Scoglio
Segnalata - IV°
Concorso 2001
Quant'era bon el pan sa l'ua
quant'er pcina ! …
Un mors de pan e un acin d'ua
s'incuntravne t'la bocca;
masticavi un pestin
e sentivi un sapurin delicat
che ugual en c'era;
en vdevi l'ora d' mandè gió un bucon
per lascè el post ma 'n antre.
C'le du', tre coppie d' ua
ch' pendevne dal sufitt sopra el mi lett
avevne da durè fin a Natal;
alora, de nascost,
sa un pess de pan t'le man
muntav t'el lett,
me slungav tutta
e spilucav qua e là
sa la speransa che nesun me vdessa.
Per Natal c' armaneva
guasi sól i raspuj;
el vedeva anca un cech
che c'era armast quatre acin...
sól mama en s'acurgeva,
perchè me vleva ben.
INIZIO
PAGINA
|