Home Luigi Lelli

Gigin Caretta: RITRATTO di NINO CESARONI

C'è in Urbin un personagg caratterista

sa 'na faccia ch' te fa rida a prima vista,

quant parla, e pó, è anca pió ginial,

sa 'n dialett del tutt original:

per di'  “sem gitti” ló te dic “gismi”,

per di'  “eravam” ló dic “fosmi”,

per di'  “ossia” te dic ancà “vienessa”,

e se qualcun rid ma ló en interessa.

Poesia in dialetto urbinate scritta da

NINO  CESARONI

dedicata a Luigi Lelli

scritta negli anni '70

 

S' i dmandi el nom, tel dic sa 'na strofetta:

“Lelli Luigi detto dottor Carretta,

Carlo Erba, passata la mezzanott,

e dop le due Lelli è belle cott,

forse, ma non sempre, perchè ve 'l dic Lelli

che 'ormai son finiti i tempi belli ”.

Da ste strofett certament avret capitt

ch' i piac da beva e da magnè cunditt ...

 

Mett só la bavarola prima da magnè

ch' porta sempre sa ló, en se vol spurchè.

A vedle a magnè è un divertiment,

magna de tutt, en scarta mai gnent;

c' ha 'na dentiera, quant' apra i labbre,

ch' par la butega de un de chi fabbre.

'Na volta, ha dett, ch' a forsa da magnè

s' èn stufat le ganasc per mastichè,

e l'ost stanc da portai el vin

i ha mess 'na damigiana sopra 'l tavlin ...

 

Quant canta c'ha 'na voc baritonal,

i piac d' cantè e canta ch'en c'è mal;

benchè sia alt, e questa e propi bella,

l'hann mess a fe 'l “bass” in t'la Cappella.

  

 

    “Caretta” è 'n sopranom ereditat

     che forse ma su' padre i hann schiafat,

     e quest faceva anca el carettier,

     carett e cavall, era el su' mestier.

     Gigi invec sotta el Comun ha lavrat,

     faceva el spasin motorizat;

     mo a dì dacsé ogg en è pió loggich,

     se chiama: “Operator ecologich” ...

     è donatore de sangue “goccia d'or”

     e sa le donasione s'è fatt onor.

 

Richiest da tutti per tiena só el moral

sa tutt i cant e le storielle original:

fatti vera che ma ló èn sucess

e quant i arconta rid anca ló stess.

Com de chi due che c'aveven 'na faccia

propi com el color d'la vernaccia;

Gigi schersand gli ha dett, un i ha rispost:

“Manca vó en set cott in bianch, piutost !” ...

S'en messi tutti in t'na gran risata,

e tutt è fnitt sa 'na sbicchierata.

'Na volta è git  a Fiuggi sa 'n parent,

tutti beveven l'acqua e ló per gnent,

mo dop un po', per onor del ver,

'na bevut anca ló qualchi bichier;

prò dic che 'l stomoch ha dacsé brontolat:

“Sa c'è oggi l'alluvion ?” i ha dmandat.

 

 

Ma 'l presid dla Scola del Libre

l'ha chiamat “colega” perchè i ha dett che

anca ló è dla Scola del “Litre” ...

Hann dett ch' c'è l'ellicott ... tel camp sportiv,

invec l'ho vist in piassa era giuliv;

mo se ved ch' cè statt qualch fagott

ch' ha prés l'elicotter per Lelli cott.

Se i dmandi se 'sti fatt en vera o no,

te rispond sol sa sta fras: “Lo saprò !”

 

 

Adess io v' n'ho dett sol qualcuna,

mo ogni giorne c' ne sarìa una,

perchè ma ló i venghen sensa sfors,

spontaneament, in ti discors.

Quest è Lelli Luigi detto “Caretta”

dalla parola semplice mo schietta,

re del bel cant e del buon umor

che guarisc ogni mal, mej d'un dotor ...

 

E tant per ripeta 'na fras sua,

ve digh: “Tira gió sta coppia d'ua !”