LA   PIASETTA   D’ S. ANDREA

di Sirto Sorini

Io m’arcord quant ér pió pcin

e giucàv a le palin,

a sergent o a castlett,

a buticchio, cioda, pancott

t’ la piasetta d’ S.Andrea,

sotta el mur dl’Ort Botannich.

E m’arcord d’una fontana

bella, lunga, stretta stretta,

dov in t’ l’acqua, cla nostrana,

sguasavne i pesc sa ‘na gran fretta.

Sopra, in alt, t’ una gran volta

a sdraión e tutta nuda,

c’era ‘na statua blina blina

ch’ la chiamaven Barberina.

Le sudat per gì a truvalla !

Quante volt a rampicon

intorn’al mur per gilla a veda,

per tucai cle tetìn dur

sa le man, anca le cosc,

e sa la testa pensè ma dopp !

Quanti gioch s’ poteva fè !

Eravam anca grandini

epur s’ giucava ai figurini,

sa i sold, s’ butavne in alt,

se faceva testa o sant,

pó s’ giucava alle cartucc,

quelle svoide de Carlucc,

se giucava a pifetta

a pó s’ dava la manetta,

s’ faceva i cartucion da ‘n ett

e s’ tirava alla cularotta sa ‘n calcett,

pó s’ girava in t’ la piasetta,

da piedi al fusacc,

vicin a la Netta,

a giuchè a cavallina

ch’ sarìa la bella insalatina,

e a ‘nì gió da pied Lavaggin,

t’ el travai de Rusciadelli,

sa i cumpagn e i mi’ fratlin

a fè Tarzan t’ i stradin.

Oh, per schers, quant volt so’ mort

all’indietra petta cle port !

Quante ser, sa tutt i oss rott

per giuchè a scaricabott,

tusulina e anch’  a cut

e a corra sa i cerchion,

sa le furcelle o sa i baston !

Mo ho paura che ‘l gioch più blin

era quel di birucin:

se partiva dalla scola,

pe’l fusacc gió ma la piola,

voltand gió avanti al poss

s’ giva fora ma chi foss.

Quante volt cle donn s’ rabivne:

per fè smetta cle chiasat,

tutt le sedie te meteven

per travers lungh a la strada

per fè fnì chel giucarlìn !

Se buscava anch sa’l ruschìn

e ogni tant per punision

s’ giva a lett p’la bendision

e du’ pagin d’italian

o a fè le division.

N’antra cosa ch’ m’arcord ben

era avanti la Santini,

t’ la piasetta de madón,

dóv nasceva ‘n’erbettina

com un quadrifoi pcin pcin

che nó chiamavàm dulcin.

Com s’ magnaven per merenda

sa’ n cul d’ pan e ‘n garull d’ mela !

Oh, burdei, en digh fregnacc,

era el temp ch’ c’era la guerra !

Cert che adess i burdei nostre

en èn minca come nó,

voine la camiscia blina,

guai le scarp s’ en c’ hann la punta,

(a pensè che no’ da grandi

purtavàm un para d’ sandol)

e sopratutt voine i guadrìn

per cumprè el muturìn;

fors anch lor avrann ragion,

nesun d’ no’ vol che lor fann

un’ infansia sa tutt chi afann

ch’ ém pasat in gioventù,

perchè quei en artornen più.