I  BUTACC

di  Sirto Sorini

Gió t’ la Vaggin fin’ a forporta,

quand d’ inverne la nev en mancava,

- m’arcord com adess -

s’ faceva i butacc.

S’ faceven pcini medi e grandini

e da la Elda ch’ vendeva la frutta

a la Vienna dla cooperativa

gió da Batist, Gagliano e Prim Mini

sa Centequindic e quei dl’ osteria.

S’ facevne i butacc ch’ chiapavne la via,

e, se ‘na machina per cas ‘niva gió,

o se fermava o argiva só.

Una volta n’ hann fatt ùn, grand e blin,

avanti l’Adelina ch’ vendeva el vin,

sarà stat alt un metre e ‘n pess,

tutti d’ intorne sa ogni mez:

pal, badil, palett e paltin.

Tutti al lavor per rinforsal

e preparass pe ’l grand event

quand i dann cacco, tutta cla gent,

e Soraron sa’ n badilin

butava la sbobba tel mez del stradin

e sotta el butacc sa ‘n antre badil,

ch’ butava la sbobba, c’era Bibìn,

Bibìn dla Padlina, m’arcord che ’l chiamavne.

Ló se meteva davanti la chiocca

le gamb incrociat, ma ‘na sola ch’ tocca,

gridava dapiedi apetta chel mur:

“Visate quand dat cacco, ch’ me mett t’ el sicur !”

La scarogna vol che quand’ hann cminciat

sa tutt chi badil a indebolì el mur,

tutta d’un tratt se sentit un bott:

è l’ultim pess ch’ va gió de chiopp.

‘Na gran fiumana d’acqua e de nev

ha investit ma chel por Bibìn

che sa la nev, l’acqua, el badil,

dentra la chiocca è scumpars t’ un balén.

Tutti disprati a corra forporta

da piedi el stradin t’ el camp de Rossini

per veda se t’ l’acqua, in mez a cla sbobba

s’ potessa veda qualcosa de ló.

Fnitt la fiumana ce sém guardati

quest è armast dentra, en gli ha fatta a ‘nì gió.

Argìm a veda da cima el condott

se se sent nient, nessuna voc.

E, dett e fatt, vedém ma Bibìn

da cima la chiocca sa ’l su badilin

travers l’ inferiata sa ló atacat:

l’ém tirat só tutt bagnat dur,

era un stracc tirat in t’ el mur.

Anch’ io sa i mi fratlin chiapav el mi paltin

e sa t’le man du stracc giv só a fè ’l butacc,

sa Gianni d’ Gagliano e tutt i fiol d’ Biblacc.

M’arcord com s’ fossa iér, se giva t’el fussacc

a fè le palutat oppur a fè el bugatt,

s’ faceven le valangh, s’ curéva com i matt

e sa t’ le man i rass se giva a casa g’lat,

sempre sa la paura da chiappè un fracch de sc’gniat.