Pubblicata ne "I quattre vent" n. 2 del 1981

Enn nutti da luntan,

chi ha dett dal Furle

chi dic' da piò in là;

ecca che na matina

s'metten ti punt strategich

de tutta la cità.

En se potut di' nient

(tant en avrien capit)

e intant facevne i sgnor,

giraven dapertutt

- a debita distansa -

cun fossre a casa lor.

Han fatt fuggia ma quei

che staven da tant prima

ti bugh di quartier alt

e s'enn messi a cmandè

sa 'n far un po' sdegnos;

e mai ch' facessre un salt

per scenda gió per terra

(com s'usa in tutt el mond)

e stè tra le person.

Invec' dai lor castell

en so nemen s'ia guarden

ma la gent di torion.

A pensè ben el fatt,

è un cmandè un po' curios;

en ve chieden mai nient,

van per i afari lor,

insomma en dann disturb.

Bsogneria che la gent,

quand va gió per le logg'

abbia un po' de pacensa,

sensa di' parolacc'.

Cert lor en enn simpatich

specialment in cert giorne,

quand fann tutt chi versacc'.

Ormai l'avet capit:

se tratta di chi corv

ch'han pres in lor posess

da qualch anett in qua

le punt di toricin

sensa chieda el permess.

A vedli volè insiem

sa ch' l'ale nere nere

fa na brutta inpresion

e po' s'pensa ma 'l fatt

che sensa compliment

hann mandat via ma i pc'ion.

Ma i' ve l'  dagh per cert,

tla stansa d'un amich

n'ho vist un da vicin,

le penn lisc' e lucent

e tutt ben petinat,

ve digh ch'è propri blin.

Quasi me so' incantat

a vedle pissichè

la carta e altre cosett,

a magnè quel ch'si dà,

a giochè sa 'l padron

e a fe' tanta mosett.

Cert è un po' dispetos,

ve porta via la robba,

(ma è la su' natura)

la nascond da qualch part

e dop svolassa intorne,

mo non ve mett paura.

Ansi, ve l'assicur,

dà gust avel vicin,

ve fa da compagnia

e magari ma 'l cor

chel svolasè d'intorne

i dà un po' d'alegria.