EL  SOL,  EL  SU’  CALOR,  LA  NOTT,  EL  SCUR

di Otello Sorini

É la matina prest, ancora è scur;

brontola el mar, t’ la spiaggia en c’è nesun,

la schiuma frigg per l’acqua contra i scoi,

mentre la sabbia rotola cum le foi;

me gira ‘l vent d’ intorne, fa ‘l birell,

me passa ‘n brivid, m’ imvad tutta la pell,

se sbatten i capei contra la front;

spunta i prim ragg del sol a l’orizont;

se sent ‘na voc contemporaneament,

urla ‘rabiata, purtata via dal vent:

«Perchè ‘n te fermi un po’, amica nott ?

É fnitt da fè i dispett, da uscurè tutt ?

Metti ‘na gran tristessa ma ‘ste mond !

Lascte chiapè, smett de girè intond:

te daggh un po’ de luc e de calor;

me senti? Te daggh tutt sa tutt el cor».

«Te sent, oh sol, e smett da bagaiè:

ipocrita e bugiard, me vo’ chiapè;

lascia gì da rompa e da scocè,

lavrasti un po’ de pió ch’ c’è tant da fè !»

«Brutta notaccia nera cum el fum:

tutti te odien, en te vol ben nesun;

te se’ ‘l teror dla gent e dla natura,

du’ arivi metti angoscia e fè paura;

io se te chiapp te sbriciol, te rend gnient,

te polverizz e pó te butt al vent.

Guarda per un moment el mi’ splendor,

lascte bacè dai ragg e dal calor;

io régol la natura, io so’ ‘l dio Sól

e a cmandè el mond, te’ l giur, armarrò sól.»

«Mo quant se’ pcin, oh sól, quant se’ purtin !

El vedi: t’ l’univers te se’ ‘n puntin !

Me de’ la caccia, te me vo’ chiapè,

en è capitt che se’ dentra de me

e se ‘n te daggh adoss, car el mi’ sól,

è sól perchè fè tanta cumpasion.

Sét a miliard a ribiravv in tond,

ma tutti dentra t’ el bui el più profond.

So’ ‘na surgnona sa ‘l preg d’essa pasient:

te lasc campè: ma te ce pensa ‘l temp;

mo ‘l giorne che te spegni, sta sicur,

ce sarò io ma lé e sarà scur.

Sarè più bon, ‘na mucchia più pasient,

e capirè ch’ el bui è tutt è gnient.

Accetta ‘ste consigli, e ardill ma’ l mond,

che la divina luc è ‘l bui profond .»